NU HMANGAIHNA

Tlai khat chu arpui in a no a hruai lai hi ka en reng a, eitur awmna zawn chu arpui chuan a hmui chuan a thai zauh zauh a chutah ar note ho chuan an pan khawm laih a, an chuk mial mial a, chutia an chuk mial mial lai chuan a pui chuan hmun dang ah kal leh in a tih dan ngai bawk chuan a ti leh thin a. A note ho chuan an chuk leh thin a, chutia ar puiin a note ho chaw ei tur a zawn melh melh lai chuan naupang pakhat hian ar note chu man mai an tum a,  a pui chuan alo phal awzawng lo mai a lim ta awrh mai a, chu naupang hlau lutuk chu a te teng tung a, a nu leh pa a ko chel chul mai a. Nui vur vur chung chuan ka kalsan ta a.

                                Ti hian ka ngaihtuah zui ta a, nu hmangaihna lo nasat zia hi aw, khatiang ran khawi mai mai mahin an note hmangaiha duhsaka duat nachang an hria anih chuan thilsiam zawng zawng chunga ropui ber mihringah te ngat phei chuan nu hmangaihna hi ana sain alo va ropui em. Nu puma kan awmlai atang tawh reng pawh khan nu hmangaihna leh tuarna hi kan chhutpui thiam em? Thla 9 chhung te meuh mai hrehawm takin min pai a, hmanlai upa ten “Hmeichhe nau vei leh mipa lo vat chu hlang chunga chuang ang an ni e” an lo tih hial thin kha, nunna derthawng takah an ding reng a, an taksa chau leh hrehawm mai bakah an rilru te thleng hian ala hrehawmin ala hah tel zel bawk a, fa duhawm leh hrisel an neih duh avangin ei leh in thlengin a tui tha tha, thenkhat ah phei chuan sum nei lo chung chung pawhin an lei hram hram a. Hun harsa leh khirh khan tam tak an paltlang thin.

                        Chutah leh ilo pian chhuaha khawvel eng i lo hmuh ve theihna turin thisen tam tak a hlauh a, a taksa mawina te leh a hmelthatna te chu a tlak phah bawih bawih anih kha. A taksa leh i taksa in zawmna lai hrui chu chep chatin khawvel eng ilo hmuh ve theih phah ta a ni. Tichuan fuke kima ilo piang chhuak a han hmuh meuh chuan nu lawmna chu sawi sen rual ani lo ang, a taksa natna leh hahna hrehawmna tin reng kha nangin khawvel eng  ilo hmuh takah chuan a hre zui reng tawh lo a, hlim takin hun a hmang chhoa i ril tamin i tui alo hala chutah duat takin a hnute tui chu a hnek tir thin che a. I hnute hne lai chu lawm takin leh duat takin a chul heuh heuh thin che anih kha, mut chhuakin a rawn zem chiai chiai che a, hmangaih leh duat taka en ngawih ngawih thin tu che i nu chuan a bulah ngei mai taksa si reng chung si che in a ti mu siai siai zel che anih kha. Hei hi i sen lai hun ani.

                          Tichuan i rawn thang chho ve deuh a, nausen ni tawh loin naupang i rawn ni chhoa, chutah pawh chuan i nu bawk chuan duat takin a enkawl chho zel che.  
                                      
                                      “Ka nu ka nu duh tak chu”

                                        Ka dam loa, a tlaivara

                                        Ka tapa min lo chawi mu thin

                                        Hah takin chak lo chung pawhin”

                                          He thu hi sawi zau vak ngai pawn a lang tawh lo, i tet laia i nu in a enkawl dan che chu tah hian a chiang hle awm e. Thenrual ilo kawm chho ve zela i thiante thil neih ang leh nangmah ngei pawhin awh ilo nei chho ve a, i nu leh pa chu hausa bera i ngaih tlat leh thiltithei bera i ngaih tlat hun lai kha a ni, an sum neihin tlin lo sateh mahsela i lawmna leh i hlimna tur anih dawn phawt chuan theihtawp chhuahin neih sak ngei che an tum thin.

 I thil awh ngawih ngawih an neih sak theih ngang lo tum che a i lungngai hmel khan i nu mittui a ti tla fova, nang ai mah khan hrehawm alo ti zawk thin asin. Tichuan nang chu ilo thanglian chho zela, i nitin mamawh leh i harsatna te chu i pa bul ai chuan i nu hneh ah i thlen hnem thin ka ring, nu te chu kan ngam zawk tlangpui thin anih hi, beisei nei tak chungin lehkha an zir chhoh tir che a, i zirlai ah i hnufum bik ang tih hlau reng rengin beka thlan tui far zawih zawihin i tan a hun a hmang thin. I len chhuaha i ho tlai chang leh hmun danga i awm changin ani hmeichhe rilru no chuan a ngaihtuah veng veng bawk thin che a,Nangmah avangin mut mu pawh tuah that loh tum ava ngah ta em. I lungai hmel leh hrehawm ti hmel i hmuhin hrehawm ti takin hun a hmang thin asin.

                                   A theih ang tawk leh a thiam ang tawka a enkawlna zarah che i zirlai leh i thiltih ah hlawhtlinna duhawm tak i chang chhoa, a lawmna chu sawi fiah thiam rual ani lo. Thenrual zing ah i chachin sawi nuam a ti a, a chhuang hle thin che asin. Mahse chutia a chhuan viau lai che chuan nang chuan thil ho te te ah i thinrim khum a, a chang leh mawl i ti a, thing i ti thul, nangmah a enkawl seilen chhohna kawnga a thil tih ve tawh leh alo hah thin zia te hre chang lo lekin i duh duh danin i awm khum a,  a chang phei chuan in vin zui  leh nghal a, chu mai chu la duh tawk loin ila ruih khumin buaina te ila siam ta deuh deuh a maw. Aw nangmah enkawltu i nu tan chuan ava nain ava hrehawm dawn tehlul em. Mahse maw chutianga i awm khum tum pawh chuan nu hmangaihna chuan a fa i nihna atangin a thloh thla ngai lo che a, i tan bang loin ala tawngtai fan fan zawk thin asin. Aw nu hmangihna lo ropui zia hi aw.