MIZORAM BAK HI RAM I NEI LO ASIN

Kumin chu kan mizoram min hruaitu tur te kan thlan kum 'Inthlanpui Kum' alo ni leh ta reng mai maw. A boruak a pui leh dawn hut hut mange aw. Kum nga lai min hruaitu tur kan thlang lh dawn ani a, mipui te hian eng angin nge kan rilru kan lo siam leh tawh ang le. Mahni duh thlan na ngeia kan thlan chhuah kum hnih khat hnua ka lo thlang ta kher kher kher kha ti a, inchhir vawng vawng na tur mi kan thlang chhuak leh dawn nge, hei zet chu ram a hmangaih tak zet mai, ka thlang sual lo e, ka inchhir lo, kan tih theina tur mi kan thlang zawk dawn?

Mipui te hi kan fimkhur ava ngai tawh em, kan mizoramah hian kum nga zet mai kan ram hruaitute'n ram an hruai duhthusam a tha leh an intiamna hi an ti hlawhtling thin em? mahni theuhin in zawh ngai lovin kan hre chiang. Ram aia mahni pumpui leh mahni vua leh vang te hmangaiha vulh lian tu politician te hi kan thlang tling reng dawn nge ram hmangaihtu tak tak retheihpui thak ngam khawp hi kan thlang tling zawk dawn.Kan hmu kan hria an ram hruai dan zawng zawng kan hre vek tawh, thlan tlakah kan la ngai hlawm em, tuna kan sorkar mek leh sorkarna lo chelh tawh te hi.

Sum hmachhuana vote zawng Political party hi kei chuan ka ning ta.An hnen atang hian Cheng khat pawh ka beisei lo a, ka beisei ngai bawk hek lo ang. He ram hian Sorkarna duh avanga Sum thehchhuak hnem Political party kan mamhawh tawh lo a, Manik Sarkar-a te anga cheng tam neilo Politician Ram leh hnam hmangaih hi kan mamawh tawh zawk. Thil tih harsa tak tak tur tiam zut zut mahse a hlawhtlinna tak tak hmuh tur awm silo hi kan beng leh kan mit hian a hria in a hmu hnem tawk ta e.

Pawisa sem tum pawh an kat leh ta nuk mai, keini India ramah pawh a State pachhe ber mai leh kan thil siam leh thar te thawnchhuah tur pawh nei manglo hian khawi atangin nge sum hi sem an tum. Sum hi sem chiam chiam a ngailova, kan State Sorkar hian a chhunga cheng mi nuaih sawm vel lek tan pawh hian chhungkaw tin tan sum sem tur a neilo bawk in ka hria. Central atangin a thu in sum rawn kala, a tak tak ah chuan Kan Government of Mizoram hnathawkte buaina bak a thleng chuang lo.kan hrethiam tlang vek ti rawh u.

Sum sem tumna hian mipui tam tak a ti thatchhe mek bawk anih hi. Kan Bible in a sawi "thawk peih lo chuan ei pawh ei suh se" a tih hi kan bawhchhe nasa ta mah mah lo maw, kan mizoram kristian za a za pawh tling tawh lo bawr vel ah hian. Sum thehchhuak thei politician leh political party thenkhat te avanga mi thatchhia hi kan pung zel anih tak ber hi maw.

Chuvang chuan mipuite hi i harh tawh teh ang u, heti ringawt hi chuan ram ropui kan thleng dawn lo, i vote hlu tak kha ram leh hnam hmangaih tu dik tak nia i hriat chauh hneh ah pe la, tichuan kan zoram hian hma alo sawn dawn nia. Hlemhletna leh eirukna Plolitician te avang hian i ram hi i hralh phal dawn em ni? Mizoram bak hi ram i neilo asin.

KA LENG CHHUAK VE A

Scooter ah pawh a tawng lam tawh khalh chhuakin zarkawt phei vel ah kan hawi champ phei vel a, Kawng sir vela nula chhelo tak tak kal vel chu ka in hmeh nge hmeh lo pawha ka hriat loh tunlaia an bun uar em em mai tarmit dum lian tak bun chung chuan kan melh phei vel a, chutih lai vel bawk chuan tunlaia bike changkang tak tak ri bengchheng em em mai ho hian nula phur van vadak vaw vaw chungin min rawn tlan pel fua fua reng bawk a.Mahse ka awt bik tlat lo, a chhan chu ka scooter hnunga ka rubber phurh hian kum 10 dawn chu min la phatsan eih lova, ka thil phur duh te tha takin min lo chelh beh sak ran thin, Ka la thla anih ngawt loh chuan a chhuk ve ngai miah lo.Mahse min rawn tlan pel pel zuai zuai ho in an phurh dak vawh vawh ho hi chu reilote hnu ah an chhuka, midang bike a an chuan loh vek pawh in car thar nalh deuh deuh ah an chuang leh fo thin. An vai chuan ka ti lo, mahse eng emaw zat hi chu anni chiang mai.

Chutia mahni neih chhuna hawi pir ve vah chunga ka tlan mek lai chuan Aizawl khawpuiin a ken tel Traffic chu a zam leh ta.Ka hma chiah ah chuan Car nalh em em mai chu a ding bawk a,a man to tur zia phei chu kei mimawl hian ka chhut pui thiam lo.Hla ring tawkin an paly dup dup mai a, pawn lam atang chuan ngaihthlak pawh a nuam tawk vel viau mai. Mahse an hla play chu a awmzia ka hre ve tehchiam lo thung, a ri bur bura a chang leh an chham leh nawk nawk thin bawk si a, kha an hla play ah kha chuan kei bel val vala val hi ka bo map mai.Keini Lallianmawia, Valzotea hla tih vel ngaithlak nuam ti tan chuan an hla ngaithlak duh zawng chu kan kur pui theih ve loh hmel hle mai.

Tichuan kan tlan tan leh ta a, ka scooter upa tawh tak chuan min hnuk ve zel bawka, nula thenkhat scooty rawn khalh pawn min tlan pel leh ta zuai zuai mai, min tlan pelh paha an perfume rim nam chem chem pawh chu hnim a nuam tawk viau a, an bulah nilengin awm ta ila chu an purfume in hnawih/inkah rim hi a ruih pawh ka rui ta ve ang.Bak thla ang tak tak kawr rawn ha pawh ka hmuh hmaih lo.

Chutia ka tlan zel lai chuan Karei! hmuh thianglo ka hmu fuh ta em ni? Dawrpui biakin chhak footpath ah ngei sawn Hmeichhe ngo vah mai hi a rawn chho nghalh nghalh maia, a sam a sen deuh thar a hnum hlap mai bawka, a mit te lah chu tu tih dan tak ah emaw Rulngan pa ang hlap mai hian a dum ham mai bawk a, tichuan a rawn kal hnai zela, ka bul zawn a rawn thlenga chiang mangkheng hian ka lo en a, ka Scooter atanga tla tep khawp chuan ka phu ta zawk mai! ka hmeichhe hmuh kha mipa lek lo zu nia, a sakruang leh a inchei zia ah chuan hmeichhia chiah chiah mahse kei hei leh chen lo tlangval tawh leh nula tam tak pawh lo bem ve tawh tu, (mahse Bem thluk phei chu ka la nei chuang hlei law ) hian mipa leh hmeichhia chu ka hai mawlh lo.Hmeichhe tam tak ai pawn kha MIPE khan incheina chu a nei tha zawk hial ang.

Ka tlan phei zela dawrpui phei vel ah chuan tunlai kan Mizorama lar em em mai Korean ho ang tak tak pawh ka hmu phei ta nual mai, an incheina engkim mai chuan a ang em em vek maia, chuta ka mit la em em mai chu an tarmit vuah rawng mawlh mai kha a lar hlawm vawt vawt khawp mai, hnar ngul sang ve vawh leh hmel paw heu mai ho heng Korean film star leh Hollywood film star te, mizo hla aia kan ngaihthlak peih zawk hnamdang zaithiam hovin an in hmeh em em kha kan nula leh tlangval thenkhat tribal hnar bawng pir per ho hian inti nalh em emin kan lo vuah ve ang sup sup a, keimah anga inhmeh lo pawh ka hmu nual mai.

AR gate hmasa zawk ka tlan phelh phei lai vel chuan heng ram zau leh hmun nuam em em mai te hi kan sorkar hian a tih ruah hun ah eng atan tak chuan hmang ang i maw, aizawl khawpui tih changtlun nan a hmang ang nge, nakin lawkah chuan mihausa in hi a intalr phei leh ter tuarh ang tih te chu mahni thiam tawk leh ngaihtuahna mawl tak chuan ka ngaihtuah phei neuh neuh chung chuan Zodin cinema hall bul ka thleng phei ve ta a.

Zodin cinema hall bul vel ah leh traffic point chunga lei an dawh vel ah chuan hair stlye mak tak tak ka hmu leh ta! thenkhat chu chhuangtuar lu ang tak tak an lu meh laiin current a awm lo thut anga ti hian an pu ta emaw tih tur awm tak tak an bek leh bek chauh mek kawlh a, a chung lama pir vu mai te, thenkhat vazun mei hmawr ni awm tak an tukhum sam tlem te chauh sei em em mai te ka hmu phei nawk mai.Heng ho hian tu style style emaw chu an copy ve ngei ang le!

Tichuan zodin traffic point atang chuan ka tlan let phei ve leh tek tek a, Civil hospital hnuai damdawi zawrhna bul vel ka thlen phei chuan Bag dum puar lian leh luah khai leh ak Vai hmel pui pui leh mizo hmel ang tak tak ka hmu phei leh nuk nuk bawk a.Chung ho zingah chuan mizo thalai pawh ka hmu phei nual tho chungin a tam zawk chu hnamdang kan State thenawm ami te vek ani ngei ang tih ka ring, heng hnamdang ho thawh ai hi ei duh leh mut duh thlai tam tak hian han thawk ta vek zawk ila tih te ka rilru ah a lo lang leh a, a piah lawk Millinium Centre kawt vela lungkham nei lek loa thu thalai tam tak chuan thahnem ngaih an ti na hle mai.

Chutia eng eng maw ngaihtuah chunga ka tlan lai chuan pum lam a rawn ri raih raih a, ka pum lamin ei tur a mamawh ta tih ka hai lo. Tichuan kan trafffic police te hah tur zia leh buai tur zia ngaihtuah phei pah chuan KFC leh Five star Hotel pawh hian ka ei duh zawng bik siam ah hi chuan an tluk kher lo ang a ka lo tih fo thin PI ENGI thingpui dawr pan chuan ka tlan phei ta vang vang a.

KUTHNA THAWH I UAR THAR LEH ANG U

Written ah pawh ka ti tha lutuk, interview pawh kha harsa awm lo" Mahse result a rawn chhuak a, an tling thei chuang lo. Sorkar hna hmu ve tura pawimawih leh paltlang ngai ah chuan ti tha ni a in hre si tling leh talo rilru na hi kan va tam em. Hna ah hian induhsakna a awm tih chu tlangin kan hre theuh tawh a, duhsak tu neih pawimawh zia pawh kan hre chiang tawk ta ani lawm ni, mahse enga ti nge Sorkar hna kher hi kan la beisei cheu? Hna thawh tur hi kan Mizoram ah hian alo tam em asin ka thalai pui duh tak te u, mahse kan tum hi a sang lutuk nge awm nawm kan tum hma lutuk zawk, Sorkar hna kher hi eizawnna ani lo tih chu kei ai pawha hre chiang tute vek in nih kha.

Harsa tak leh hrehawm nasa tak paltalngin lehkha i zira nu leh paten i zirlai hun chhung zawng khan sum tam tak sengin an chawm che anih kha, chung harsatna zawng zawngte chu paltangin tunah chuan Graduate, master degree leh Ph.D. degree te hial pawh ani mahna ilo nei ve ta a. chutah i lehkha zirlai hun chhung zawnga ilo suangtuah leh nih ilo chak em em thin Sorkar Officer chu nih tumin i han bei ve ta a.

Mahse a chunga kan sawi tak ang khian hlemhletna leh induhsakna tenawm tak te avangin i tling ngei dawna i hriat hnu ah i tling zo leh ta lo a, rilru na leh hrehawm ti takin i indawm kun tlawk tlawk thin a, a hnu lawkah hna dang i dil leh a, a hma ami ang bawk khan hnawl i ni leh thin. Han ngaihtuah let vang vang teh, duhsak tu leh hmelhriat tha i neih ve loh avanga i thawh ve theih loh thawh talh i tum avanga i hun hman liam tak zo zai te kha. Khang i hun hman ral zat vel tho kut hna thawh nan leh mahni ke a din tuma hna dang lo thawk ta i zir chhuah pui te hian eng ang hlawhtlinna nge an neih hman tawh.

Kut hnathawha,kawr bal tak inbel hi i zak a mi, Sorkar hna thawh tum a nalh tak taka in chei vunga exam pek tlut tluta tlin theih tak tak mang siloh kha a zahthlak zawk lo maw?chhungte thawh chhuah sa a lei, Showroom branded nalh tak tak hak a, Bank Account a pawisa awm mang silo nge i duh a, ilo ngaihsan vak loh leh i nalh tih lutuk lem loh kawr ha a, hna theihtawpa thawha Bank Account a pawisa awm ve im em.

Chhungte leisak motor changkang tak tak leh bike nalh tak tak khalh nge nuam anga, mahni thawhchhuah ngeia lei motor emaw bike second hand pawh nise khalh,chhungte petrol/Diesel man dil dun dun ai chuan mahni thawhchhuah ngeia petrol/diesel thun chu a dan a dang deuh lo maw.

Lehkhathiam ni ve si a, chhungte tawhchhuah ringa Phone changkang leh tha ber ber hman a, topup thuna dil dun dun chu a zahthlak deuh lo maw.
Thil dang pawh ala tam mai amaherawh chu sawi vek kher a tullo a, ka sawi tum ber pawh a ni lo bawk.

Ka sawi duh tak zawk chu hei hi a ni, kut hnathawh hi uar tlang ila,zah ah ila lo ang u. Kan vela awm hnamdang ho hian kan ram leilung hausakna hi min lak sak zawh hma hian thalai lehkhathiam zawk te hian kan thiamna leh kan finna te hi chhawr tangkai ila, kan ram hi ram nuam leh chhuan tham khawpa hausaa siam thei tu chu thalai te bawk hi kan ni asin.

Ka thianpa thu sawi hian min ngaihtuah thui tir khawp mai, " Kei chu hausak ka duh a, Sorkar hna ka thawk peih lo, chuvang chuan Sumdawnna leh kuthna thawh ka duh zawk" a ti a. Ka ngaihtuah vang vang hian a dik ka ti khawp mai, Sorkar hna hi dik leh rinawm taka thawh chuan hausakna tur vak hi a awm teh chiam lo. Mahse hengte avang hian Sorkar hnathawh hi ka sawi mawi lo leh thalo ka tihna a ni reng reng lova, a thei leh a thiam tan chuan a tha lutuk a, mahse Sorar hna ringawta kan in nghah tlat hlawm avang hian lehkathiam hna hmu lo hi kan Mizoram ah hian kan awm teuh phah ta anih hi.

chuvang chuan kan it leh kan chak Sorkar hna hian min daih ngang tawh siloh chuan thil dang hmanga ei kan zawn tlan a ngai ta tihna mai. Kan Pathian thu in thawrimna zawng zawng ah hlawkna a awm a ti a, rim tak leh taima taka hna kan thawh chuan hlawhtlinna hi khawi hmun ah pawh hian alo awm zel a ni.

A tawp berah chuan Written test leh interview ngaih lohna Kuthna thawh hi Thalai lehkhathiam zawk te hian i uar ang u. Kan mizoram pawisa Murmua te, Salima ten an ram lama an thawn thlak zo zai hi a uihawm tawh e mai. Chuvang chuan Hawh u Puan ven sawi chhing tha leh ila theihtawpa thawka Pathian malsawmna dawng tlak leh kan Ram leh Sorkar tana chenfakawm thalai ni turin tan i la thar leh teh ang u hmiang.

Streets of Heaven

Sherrie Austin hla sak "Streets of Heaven" hi kan hre theuh awm e, he hla lungkuai leh lungchhiatthlak tak mai ah hian nu in a fa a hmangaihna a lang chiang hle in ka hria. Manganna leh beidawnna khur thuk bera kan awm lai pawha belh tlak leh rin tlak Pathian auh a pawimawh zia a tarlang chiang hle bawk.

Chhungkua ah chuan kan hre theuh anga, zin bo vang vang tur te kan in ngaih thin zia te pawh tem chhin tawh vek kan ni ang. Amaherawhchu, zin bo te hi chuan haw leh hun an nei thin a, chutiang ni lova kum 7 lai mai duat tak leh hmangaih taka an lo enkawl an fanu khawngaihthlak tak mai, natna khuma mu mek chu he khawvela hmu leh miah tawh lo tura an in hriat meuh chuan a nat dan tur zia chu ngaihtuah phak bak a ni.

Tlumtea thlira an lo thlir, an fanu lo len hun tur te leh hlim taka an chhungkua an awm dan tur te an suangtuah ve rauh rauh laiin, rin loh leh beisei phak lova damdawiin khuma thi ang tluk maia let reng han hmuh chuan nu hmangaihna atang chuan a tana thih hial pawh a huam ngei ang le.

Chutia damdawiin khuma an fanu mu reng chu a en a, a beidawng ngawih ngawih a, nitin bang lova a biak thin Pathian chu a bianga mittui far zung zung chungin a au leh ta a.

"Lalpa, damdawiin room number 304 atang bawkin ka rawn be leh a che. Zing dar 2 lai ri tawh mahse, min lainata min rawn tlawh tu te an haw fel tawh a, tunah chuan natna nena inbeihna hun kan hmang mek a ni. Zanina ka bula mu ka fanu hian naktuk ni chhuak hi a hmu leh tawh kher lo maithei. Lalpa, ka mittui te min hruk hul sak la, ka fanu hi a natna lak ata hi min chhanchhuah sak hram teh."

A mittui chu dan rual lohvin a rawn luang zawih zawih a. A fanu hi an la ngai em em a, duat taka an enkawl chungin an in kawl chhung a la reilo em em a ni tih te a ngaihtuah zui zel a. Tin, Pathian chuan vanram ah mi leh sa thahnem tak a nei tawh ni a a hriat avangin engvanga a fanu kher lak sak tum nge a nih tih te chu a rilru ah a lo lang a.

"Vanram kawtthler luah lum tur mi tha tak tak te chu i ngah tawk tawh lo em ni? Ani kher kher hi engvanga min lak sak tum nge I nih? Lalpa, ka fanu hian min la awmpui rei lo lua em mai, amah ka hmangaihna kut a kuangkuah hi ka la khamlo asin. Nakinah chuan I hnenah, i fanu duhawm tak ni turin chatuan atan a la rawn kal dawn tho alawm. Mahse Lalpa, a hma ka va la ti em!"

A sawi zawh chuan a ngawi vang vang a. A lungchhia a ni tih hriat takin a in hnit faih faih a. Hun kal tawh te a mitthla ah lo lang zut zut in, hlim taka an awm lai te a ngaihtuah chhuak a. A fanu piancham an lawm ni te chu TV screen lianpui en ang mai hian a suangtuahna mitthla chuan a hmu chiang em em mai a. A fanu in hlim em em a, a birthday cake a zai lai te leh hun reilote inkara he khawvel a chhuahsan tur te chu a ngaihtuah zui a. A la naupang si a, tunge lo duat anga, tunge lo enkawl ang?

"Zaninah hian a piancham kan lawm zana, a birthday cake zai chunga a duhthusam te kha ka hrechhuak a, nang pawhin I la hre ngei ang. A len huna sakawr chung chuan a chak thu leh thinlung thianghlim tak anih avanga amah hmangaih em em tu a pa hi pasal atan neih a duh thu a sawi bawk a nih kha, a pa aia mipa tha leh amah duat tu an awm a a hriat loh vang anih kha tiraw. Lalpa, a len hun atana a duhthusam a ni a, tunah chuan a la naupang lua em a, amah maia kal bo tur hi chuan ka la ngaihtuah asin. Kum 7 a ni awrh chauh a ni a, tunge vanram kawtchhuah ah lo hmuak ang? Tunge vanram kawtthler ah te chuan lo kai ang?"

A fanu chu kal mai tura a han suangtuah chuan a ngai ngam ngang lova, Pathian chuan ani tel kher lo pawhin mi tha tam tak a nei sa tih a ring a. Pathian pawhin a fapa a chan tawh thu te ngaihtuah chhuakin, an dinhmun te chu inang ta riauvin a hria a.

"Ka fanu hi ka van angel neihchhun a ni a, nang erawh chuan tam tak i nei a ni si a. A tan hmun i zuah sak tih pawh ka hria a, mahse Lalpa, tunah chuan hetah In a nei ve asin. Ka dilna hi min ngaihthlak sak em ka hre lo, mahse tawngtaia dil loh che hi chu tih tur dang neiin ka inhre si lo. I khawngaihna ka rawn ngen nawn leh e, nang pawhin I fapa ngei i chan tawh a, a nat zia chu min hriatthiampui ngei ka ring e."

Amaherawhchu, Pathian meuh khatianga a ti kha a in ngaihtuah fim a. A duhdan anga a tih kawi mai mai theih a ni lo tih a in hrechhuak a. Beidawnna lian tak a neih rualin, beiseina eng in a rawn zui lehnghal a.

"Mahse, Lalpa nang chu danglam ngailo i ni si a. I duhdan leh ngaihdan chu sawh sawn sak thei turah che ka in ngai lo. I van In nuamah i hruai dawn a nih chuan vanram kawtchhuah ah lo hmuak la, a kalna apiangah hruaiin vanram kawtthlerah te chuan i kut vawn tir tlat ang che."

A rilru a in paih thawl hawk hnu chuan, a mutna te siam remin. Eng pawh tawk sela, a inpeih a ni tih hriat takin thlamuang takin a muhil ta siai siai a.

PUTAR KHAWNGAIH THLAK THU MIN CHAH CHU - 1

       

Chu damdawiin tlang theng tho nuam tak maiah chuan, kan ral leh lama Aizawl khawpui lang pe ut mai chu ka thlir vang vanga, khua a lum em em maia, mahse kan thlang lampang atanga thli rawn tho chho heuh heuh chuan min rawn chhem heuh heuh maia, chutia thli fim dawng paha khawpui pe un mai ka thlir vang vang lai chuan ka bulah hian mipakhat hi a rawn kala, ka en zawka putar kum upa ve lam tawh tak mai hi ani a, ka bula thutna rawn rem ve pa chuan “ Vala, helai chu ava nuam vang vang ve, chhak lamah khian ka thu a, khua alum in mi an tam bawk sia ka thaw a pik tlat mai” ati a. Kei chuan nuih suk chung hian “ Thu ve rawh ka pu,thli hi a thaw veng veng maia a nuam riau asin” ka ti a, a ipte zen rak rak pah chuan meizial hi a phawrh a, a kawrhma ipte atang chuan a lighter chu la chhuak lehin a meizial chu a tan a, an hip vang vanga, chutah kan hma zawn thlir vang vang pah chuan “ Vala, enge I tih ve, I chhungte I hruai ve em ni” ati a, kei chuan “Aw ka nu ka hruaia tunah khian doctor in a en meka” ka ti a, “ enge I nu chu cancer ve a” ati leh a, kei chuan “a hnute hi a cancer vea, mahse Pathian zarah a tha e” ka ti a, meizial zuk vang vang pah chuan kan ral leh lam chu a thlir vang vang a, chutah muang ban cher chawrh hian “ E, a lawmawm hlauh chu, hmute te chu a dam leh hma an tia lawm” ati chuai raih a, chutah a hmel chu ka en a, lungngaihna leh harsatna tam tak tawk hmel hi pu tlat hian ka hria a, “ ka pu, nang enge I tih ve zawk, I chhungte I hruai ve em ni” ka ti a, anni chuan “hruai lo e,keimah zawk hi ka nia” ati a, “ anih tak chu mawle aw, I eng nge cancer ve zawk” ka ti a, anni chuan “ ka hrawk hi alawm mawle”, ati a, mak ti tak chunga en pah chuan “ ani maw, mahse ka pu kha meizial te ila zu hlu hlut bawk sia, kha kha a tha lo viau lo ami ka ti a” nui vur vur pah chuan “ Doctor te pawh in min hrilh alawm, mahse maw Vala, ka tan chuan awmzia awm tawh chuang hleinem, anih tur ang ang ka ni zo tawh a, ka dam leh ka dam lo hi chu khawvel doctor te kutah a awm tawh hleinem, lei leh van leh min siamtu Pathian thu thu ani tawh a lawm” ati a.

“ Ka pu, I thu sawi chu a dik ka ti hle mai, mahse meizial kha I zuk zel chuan I taksa khan a tuar tial tial anga, I dam hun chhung tur hi a tawi tial tial zawk lon’ng maw” ka ti  leh a, ani chuan thawk halh pah chuan “ Ni e, mahse dam reng pawh hi ka tan thlakhleh nachhan tur a awm tawh chuang hleinem, chhungte ka ti buai tam mai mai niin ka hre zawk” ati leh a, “anih leh ka pu, I chhung ten an rawn hruai lo che em ni?’’ ka ti a, “ hruai nang thingtlang khua ka ni a, keimah in ka rawn kala” ati a. Chutah, kei chuan ka han en leh vang vanga, a incheina leh amah ka en chuan ka khawngaih ru em em maia, kamis pawl rawng da lam tawh hi a ha a, kekawr chawhchi buh pawlh rawng da lam tawh hi a ha bawka, slipper pan lam tawh hi a bun bawka, a hmel en chuan a pawr fap maia, chutah kei chuan “ anih tak chu mawle, I tlangval hle mai, chuan khawi vengah nge I thlen” ka ti leh a, chuatah anni chuan “ Khulai cancer te khualbuk ah khuan ka thlenga, aizawl ah hian ka fanu chu pasal neiin a awm vet ho na a, mahse tih buai ka hreh deuha, helai hmun hi alo hnai zawk bawk nen ka thleng ta mai” a ti a, “ Mahse ka pu fanu tea wm ve renga, helai hmuna hmelhriat hleih loh te nena thlen ho chu a hrehawm zawk lo ami, I fanu te inah chuan ei leh in tha leh nuam ti takin I awm thei zawk awm si a” ka ti a, “Helaia, damlo dang te nena rilru in pawh tlang taka awm hi nuam ka ti zawk” ati a, ka rilru chu a mi chhana chuan ati vak thui hle maia, a fanu te hian an enkawl peih lo em ni dawn chu aw, ka ti rilru neuh neuh a, amah chu han kawm chiana, a chanchin chu hriat chian ka chak telh telh maia, tichuan ka bula ice cream an zawrh chu ka va lei te te a, pakhat zawk chu ka pek pahin “ka pu kha ei rawh ka ti a,” anni chuan inthlahrung tak chunga lak pah chuan “ Vala, ka lawm e, I fel hle mai” min ti a, “ engmah anih loh kha, khua a lum e mai, I ei dun mai mai ang” ka ti a, a ice cream ei lai chu ka en renga, tui tih hmel em em mai hian a liak duiah duaih a, thil tui leh tha a ei khat tih hi a hriat ngawih nawih maia, chutia kan ei dun lai chuan ti hian ka zawt ta a, “ ka pu, zawhna awm anih leh nih loh chu ka hre lo naa, khawngaih takin min hrethiam la, I chanchin hi I sawi hreh loh chuan min hrilh thei a ngem? Mahse  sawi hrehawm anih chuan min ngaidam la, I sawi lo mai dawn nia” ka ti a, chutah aw hnual raih leh lehlam thlir vang vang pah chuan “ka chanchin hi ka hmelhriat loh bulah hian ka la sawi ngai miah loa, mahse tlangval fel tak leh ka mi rin zawng tak mai inih avangin, ka hrilh ang che” ati a.

Tichuan chu putar khawngaih thlak tak mai chuan ti hian a chanchin chu min hrilh ta a. “ khaw pakhat ( a khaw hming min hrilh hi ka lo theihmghilh ta daih mai, min lo hre thiam ula) a piang leh seilian ka ni a, a tawi zawngin sawi ta mai ila, chu khua ah chuan khaw khat pa fiamthu duh leh khaw khat pa rawn ka ni ve thina, khua a mite pawh hian min ngaina in min thlamuan pui ve em em thin, kan nupa hian kan taima in Buhl eh thlai ah pawh Pathian malsawmna ka dawng ve em em a, rual awt lutuk loin kan awm ve thin, fanau ah pawh Pathian malsawmna kan dawnga, fa 3 mipa 1 leh hmeichhia 2 kan nei a, mahse vanduai thlak takin kan fapa hian a tlangval tirh hian min boral san hlauh maia, a tuar pawh kan tuar hle ani, Tichuan ka fanu te 2 chu duat tak tein kan duata, an thil awh leh duh hi chu kan phak tawk leh kan theih ang tawkin kan tih sak ve hram hram thin, tichuan hun a kal chho zel a, kan kum pawh alo upa chho ve tial tial a,that e paw halo thum ve tana, mahse ka fa ten rual an awh ai chuan tiin, an zirna leh silh leh fen te kan neih sak thieh dawn phawt chuan, heng tuna ka ka hrehawm tawrhna hi chu nakin ah chuan min la chawm let ve anga,a nuam dawn em asin tiin rilru phur tak chungin ka thawk ve thin.

Hun leh nite chu a liam ve zung zunga, ka fate pawh chu an zirna ah te chuan hlawhtling chho ve zelin,hna duhawm tak Pathian zarah an thawka, pasal pawh tha tak an nei ve ta, hmeichhia an nih avangin an pasal te inah an lawi luh a ngai tawh si a, kan nu nen chauh kan awm takah chuan kan khua hi a har thei em em maia, kan ei leh in thawk chhuak turin lo te neiin hna pawh chu kan la thawk dun tang tanga,chunga kan thlai thar leh buh te pawh chu kan fate chu kan thawn tang tang thin, tichuan kan fate pawh chuan fate an nei ve ta a, kan nupa chuan kan lawm em em maia, tunah chuan tu hmel kan hmu ve ta kan ti a, kan neih ang tawk tawk thlai leh thei te hi kan pe thina,engemaw ti a, kan zin chang te hian kan tute bulah chuan kan tap chawt thina, kan khaw lama kan hawsan dawn te hian kan huphurh thei em em a, ngai em em chung hian kan haw san thin, tichuan hunt e a kal ve zela, kan tute pawh chu an rawn thang lian chho ve zela, tunah chuan nula tlangval anni ve thuau tawh a, college te pawh an kal ve tawh, keimah hi thawk khat lai atang khan ka hrisel lo em em maia, hna pawh ka thawk tha hleithei tawh loa, kan nu hian a theih ang tawk tawk hian hna chu a thawk thin a, kan thlai thar te chu ka in enkawna turin damdawi lei nan a zuar kual lawp lawp thin, sum kan han in daih loh deuh chang hian kan fate chu pawisa puk dil mai a rawt thina, akhai, tunah zawng an fate zirna a hautak bakah kan ti buai lutuk ange tiin a theih ang chin ah chuan dil buai loh hi ka duh hram hram thina, kan nu hian aw an pasal te nen sorkar hna an thawk veka, keinina puk kan dil te chu an phal em em ang ati thin a, mahse keimah hian ka phal ngai lo ani. Tichuan ka natna pawh chuan zual lam a pan tak zel avang chuan Aizawl lamah ka rawn in entir a, doctor te chuan min han check kuala, ka hrawk a cancer thu min hrilh ta a, ka hriat tirh chuan ka thla a phang em em maia, a in enkawl nana in senso tur te ka han ngaihtuah thin a, ka rilru a mangang ngawih ngawih maia, keini sum lek hian khawi ah mah kan in enkawl thei dawn lo tih hi ka hre si a, mahse ka rilru te te chuan tunah chuan fate sorkar hna thawk kan nei tawh bawk alawm, puih kan ngaih miau si chuan min pui hreh lo ang chu maw tiin ka haw ve ta bauh bauh a.

Tichuan zanriah kan eikham hnu chuan ka fate nupa bulah chuan ka natna leh doctor ten a an damdawi min chawh chu ka han hrilh ta bauh bauh a, hei tunah zawng I nu nen chauh hian kan thawk ani ve tawh maia, chu pawh chu hetia ka dam loh atang phei kha chuan I nu chauh hi a thawk tu ani tawh mai si a, sum lamah kan in daih dawn lo nasa mai si a, min puih kan ngai dawn ani, mahse a thlawn ringawta in sum hman ringawt chu ka duh bik hauh loa, ka han in enkawl dam te te anga, kan han thawk leh tang tang anga,chutih hunah chuan kan rul leh em em ang che u ka ti a, min khawngaiha min duat ka rin teh lul nen chuan, ka fanu a te lai zawng zawnga thi leh thau pawlha, a sur a sa hnuaiah leh hriam leh zum karah pawh an nawmsak loh hlaua kan thawk tawk tawk sak thin ngei mai chuan ti hian min chhang ta nih chu “ ka pa, avan buai thlak tak e aw, hei vawiin ah kan sum neih chhun zawng zawng motor thar lei nan tiin bank ah kan lo dah lut veka, tunah chuan sum kawl pakhat mah kan neih tawh lo, mi ta puk lah chu kan pa hian a duh lo bur mai bawk si a” ati ta a, chutah ka makpa lah chuan min hnem dawn emaw tih nak alai chuan “ Nia, midang ta han ban hi ka thil tih mi ani lo bur mai bawk si a, Mami (ka fanu pakhat zawk) te saw in va ti mai dawn mi, anni hi an nei zawk ang” ati ta a. Chu thu kan hre chiah chu ka rilru hi ana zawk zawk maia, ka hnuk hi a ulh lek lek maia, chutah harsa tak chung chuan nie, zing khua te han var sela naktuk ah mami te inah chuan ka va kal ange ka ti a. Tichuan eng eng emaw kan sawi hnu chuan mut zai kan rel ta a.

Mut hmunah chuan ka han ngaihtuah neuh neuh a, ka rilru hi a na em em maia, ka faten heti hian min han ti ta chu ania, khawvel hi ava mak ngai em, mahse naktuk ah mami te inah chuan ka han kal leh phawt  aniang chu, anni zawngin min lo tanpui duh ngei ang ka ti rilru rauh rauh a, tichuan eng eng emaw ka ngaihtuah zuia, ka lo muhil ve ta a.

Hello Darling

Kan intawn ni atang khan kum tam tak a liam  ta. BA final year ka zir kum a ni a, zir nasat ngaih lai anih avangin college lamah pawh kal tam lutuk lo chuan keima in luah lam ah ka zir nasa tawh zawk a. Fresher tur te tan admission tih hunlai anih avangin kei pawh ka lehkhazir chawlh karlak ah zirlai hruaitute tawiawm turin Help Desk lamah chuan ka tei phei ve a.

Ka chhuak ta kha ka inchhir loh ber tum a ni awm e. Khawvela ka hmeichhe hmuh tawh zawng zawng zinga duhawm ka tih ber mai ka hmu ta. Inthlahrung leh zakzum taka College gate bula a thiante nena ding khawm telh telh chu thin phu dup dup in ka pan phei a. Zah pawh dawn lova puih an ngaih leh ngaih loh thu ka va zawh laia a mitmeng mawi leh fiah taka min en kalh lai te leh a aw no nem nalh taka min chhanna te chu nimin lawka thil thleng ang maia chiangin ka la hria a ni.

A kut no taka min chibai lai khan ka chhungril hi a hlim veng veng a, thlah mai pawh a harsa talh mai. Tlai lam mess order a ngaih tawh avanga haw mai ka tum laia, “Khawngaih takin i phone number min lo pe, thil hriatchian loh kan neih palh a kan rawn zawh theih nan che,” i tih khan ka thinphu a buai a, theih ni se vawi sawm pek che pawh ka huam asin. Melh tur ber pawh hrelova ka hawi kual paha ka number ka sawi laia ka sawi bah nuaih dan te kha i la hre ngei ang. I number ka dil let ve lai che leh ka save lai pawh ka hrelo.

I hmel hmuh nawn leh chak zek zek in ka haw a, ka room pawh i phone number en chunga ka rilru a chhiar khauh khauh pahin ka lut a. Vawi tam tak ka hmehchhuah nawn hnu ah chuan ka huaisenna zawng zawng sawmkhawm in ka phone ken na kut khur dar dar chungin i number chu ka dial ta a, a vawikhat ring naah chuan hmuh theih khawpa nasa in ka thin a phu a, thil dang ngaihtuah lova ka en reng lai chuan, “Hello” a rawn ti ta talh mai. Rei pawh kan inbe lo, sawi tur ka hre thlawt lo a ni. Khami zan khan lehkha zir pawh ka tum reng reng lo, rilru a ngaihtuah veng veng pah che in ka mu lut zui a, mutthilh pawh a har ngei mai.

A tukah chuan inhmuh na tur ka sawi ah kan inhmu leh a. Nitin, a thar zel in ka thinlung ah hian a saptawng taka “spark” an tih ang hian a awm reng mai. Mak ka tih em em chu, ngai ah ka neih thei lo che hi a ni. Ka hmuh hmasak ber ni a ka zam nasat ang tho khan ka la zam reng mai.

Hun te a lo kal zel a, reilote chhungin hmangaihna li pui ah kan lut dun chu a ni ta. In in luah thara chaw ei a min sawm zan te kha, ka rilru a lawmna min siam veng veng turin midang bulah pawh thu lovin ka bulah zel khan i thu kha a ni a. Ka haw dawna min rawn thlah a, kan in kalsan dawn laia ka rilru a insual nasa zia te kha. Sawi tur nei teuh mah ila milim ang maiin ka ding khawng reng a. Nang lah chu zak tih hriat takin hnuai lam i melh a, a reha a reh ngawih ngawih lai chuan ka theihna zawng zawng sawm khawmin i hmui sen vam ham mai chu ka fawp ta chawih mai a ni. Kha tluka vanram tlafual kha a awm theiin ka ring lo.

Thuro nupa ang maiin hlim takin kan hun leh ni te kan hmang dun zel a. Tudang kan ngailo takzet a, inzui reng kan nih avangin pakhat zawk zawk reilote a buai pawhin khua a har duh thin ngei mai. Mi te hmuh khawpa hmangaihna in min bual so lai chuan dan rual loh thil hrehawm a lo thleng ta. Zoram lamah ka haw a ngai!

Lungpui den dawt aiin i tan chuan a na ang tih pawh ka ring hlel love. I tana chung si ar lak pawh ka huam laia haw a ngai ta chu ka huphurh tak zet. Mahse lungngai lo tura ka hrilh lai che leh, kan inhmuh leh thuai tur thu ka hrilh lai che a i mittui dan rual loh a lo luang chhuak te kha, ka tana luang chhuak an nih avangin a va hlu em! I hmuh loh lai khan ka mittui pawh a far ve hial asin!

Tichuan hun leh nite alo liam ve zela, kei pawh hna tha tak neiin ka awm ve ta. Ka hna avanga phone hman theih lohna hmuna kan kal chang a tam si a, ka van ngai thin tak che em! Nang pawn min ngaih zia thu te i rawn sawi ve fo thin kha. Hmun hran daih a awm ni mahila ka rilru chu a hla ngai lo.

Mahse khang hun lai zawng zawng te khan nang chuan rilru pek na dang i lo nei der tawh si a. Ka rilru a i awm veng veng thin lai leh nangma tana hna te theihtawp chhuaha ka lo thawh ve tang tang thin lai te khan i hmangaih thar nen chuan hlim takin in nui har har awm si a. Ka thinlung hi i rinawm lohna ngunhnam chuan a chhun thi zawih zawih anih hi. Ka hua che a, ka hmangaih bawk si che a, hetiang em em a hremhmun hrehawm hi a awm thei chuang dawn em ni?

Khawharna ten min fan a, lunglenna te chuan min kiansan an tum si lo. Khawvelah hian mal ngawih ngawiha inhriat chang ka nei fo mai. Ka ngaihtuahchhuah apiangin ka bianga thinrimna mittui lo luang chhuak te hian ka mut na lukham te chu dawl zawrin a zawr tir hnep thin asin. Nangmah theihnghilh che hi ka tum ber a ni a, mahse theihnghilh ka tum nasat poh che leh ka rilru i luah hneh thin si. Nangmah hriatchhuah theihna ang ang i thlalak te pawh ka chep chhe vek tawh, mahse chung thlalak aia chiang zawk mitthla erawh a cheh chhiat ve theih si lo.

Khawlaia chhuah chang pawhin hmuh che beiseiin ka hawi vel ruai thin a. Khawiah mah hmuh tur i awm si lo. Beiseina beidawng mai a ni, ka chan ni.

Khawharna te tlanchhiatsan tumin kei pawh a theih chin chin ah intihhlimna hmunah te ka kal thin a. Ka lunglenna a zual chang chuan zu te pawh ka in hial thin. Mahse, a hnu ah lunglenna leh khawharna te chuan min rawn pawh leh vat thin. Ka vannei ka ti dawn nge, vawiin a ka message dawn kha ka lawm ngei mai. Kan lehkhazir pui thin hmun hrang hranga awm tawh te inhmukhawma chaw ei tura sawmna ka dawng ve hlauh mai a. I kal ve phei chu ka ring chuang lo na in, rilru lak penna ka duh em vang zawkin thian hlui te hmuh tum chuan nalh thei ang berin ka induang chhuak ta a.

Ka rawn thlen khan hmelhriat loh te pawh an lo awm nawk mai. Hmelhriat hlui leh thian te nen kan inchibai lawp lawp a. Chutih lai chuan hmana College gate bula ka hmuh, zakzum leh inthlahrung tak mai kha ka hmu leh ta. Ka thinlung chu tek a den ang zawkin a rawn thar leh a. Ngai teh, i mawi ngaiin i la mawi reng e. I nui hmel duhawm leh ngaihnobeina zawng zawng te pawh mi rawn hmuh ve rualin mak tih na in a luah khat ve tih ka rawn hrethiam nghal mai.

Muang changin ka rawn pan che a, nang pawh i mize ngai te te in hnuai lam en chungin i ding ngawi reng a. I bul ka rawn thlen chiah chuan, i danglam bikna a rawn lang leh a, keimahah chuan zam na namen lovin min rawn tlakbuak leh ta. Mahse, inti pachangin i chanchin te chu ka zawt mawihnai ve  ta che a. Mi zinga chanchin sawi a nawm loh avangin i kut ah ka kai a, inchung verandah tuma awm lohnaah chuan ka kai chho ta che a. Sawi tur a tam rualin sawi tur kan van hle bawk.

Ka tana zawhna zawh har theihtawp, “I ngaihzawng thar chu enge a an? I hlim em?” tiin ka zawt rawih che a nih kha. I hlim thu leh i that thu ka hriat te chuan keimahah thu chiang takin min hrilh a, ka rilru a zawhna tam tak te pawh chhan in a awm nghal a ni. Nang pawhin ka hlim leh hlim loh thu te min zawt a. Sawi ka duh lo viau nachungin ka rilru tak tak i bulah chuan ka phawrh thin kha; ka tha a, amaherawhchu zan mut a har thin zia te leh ka lunglen avanga ka mittui dan rual lova luang thin te chu ka sawi chhuak ta phawng phawng mai a ni.

Ka sawi tum tak zawk erawh chu ka hmangaih reng thu che leh ka ngaih thin zia che hi a ni a. I laka ka tihsual zawng zawngah ngaihdam ka dil duh bawk che a ni. Engmah sawi lovin kan ding dun a, nang pawh i mittui a luang a ni tih ka hmu hmaih love. Sawi kher lo mah la, min ngaidam a ni tih i hmel duhawm takah chuan ka hmu asin.

Kan nunhlui te chu sawi kher ngai lovin kan ngaihtuahnaah a lang zut zut a ni tih chu kan hre dun awm e. I lam ka rawn pan hnai a, nang pawhin mi lo kuah nghal a. Ka dar a bei chunga i insut faih faih ka hmuh te chuan kei pawh nunhlui min ngaihtuah tir nasa ngei mai. Ka tih thin dan anga i mittui hruk hul sak te ka tum laia i hmui sen vam ham mai chu ka mangtha nan che tiin ka rawn fawp leh a. Tichuan, engmah sawi lovin ngawi rengin kan inkuah a, inhnuai lama kan thianten “Hello Darling” tih an play rik riai riai lai chuan muang te te in kan lam dun mek chu a ni si a.

Mahse, hetianga awm reng thei kan ni tawh lo. Mi min hmuh hma in tiin i mittui te chu ka hru nawn leh a. Nang pawh i make up te inhnawih tha leh in, i inchei mek lai chuan vawiina kan inhmu chu ka lawm thu leh ka rilru pawh a hahdam sawt thu ka hrilh che a. I thiltih apiangah Pathian hre rengin lo ti thin la, ani pawhin a malsawm zel ang che tiin ka thiam ang tawkin ka tlip zui a. Tichuan, muang changin inhnuai lam pan chuan kan inzui thla a.

Tunah chuan nun thar a nungin ka hma a hmachhawp awm hrang hrang te ka tawn a tul tawh thu leh kan nundan hlimawm tak leh hun duhawm tak te chu theihnghilh tuma ka kal a ngaih tawh thu te ka hrilh che a. Tin, ka tanga i bei leh duh anih phawt chuan nang lo chu hmangaih dang ka neilo tih ka hrilh bawk a che.

Ka kalsan tawh ang che, i bula ka awm reng chuan naupangchhia ang maiin ka talbuai leh dawn. Kan in mangtha laia i hmel mawi tak maia mi en te chu tlai ni tla tur ina kawl a chhun eng phut a tluk lohna a awm lo. I kal liam thlengin ka thlir zui che a, kei pawh tihtur dang ka neih tawh loh avangin haw lam ka hnaih ve ta a. Ka bianga mittui sur zung zung chungin ka car ah chuan he hla hi ka play chhunzawm leh ta a.

Hello Darlin'

Nice to see you

It's been a long time

You're just as lovely

As you used to be.

How's your new love

Are you happy

Hope your doin' fine

Just to know it

Means so much to me.

What's that Darlin'

How am I doin'

Guess I'm doin' alright

Except I cant sleep

And I cry all night 'til dawn.

What I'm trying to say

Is I love you and I miss you

And I'm so sorry

That I did you wrong.

Look up Darlin'

Let me kiss you

Just for old time sake

Let me hold you

In my arms one more time.

Thank you Darlin'

May God bless you

And may each step you take

Bring you closer

To the things you seem to find.

Goodbye Darlin'

Gotta go now

Gotta try to find a way

To lose these memories

Of a love so warm and true.

And if you should ever find it

In your heart to forgive me

Come back Darlin'

I'll be waitin' for you...