Hmangaihzuali - 2

Chumi zan ang reng renga kan in pana ka haw chu ka lawm leh ka ke pen a zan lai ka hre ngailo.Nuam ka ti a,mahniin ka nui phei ang vur vur a,min hmu an awm lo hlauh a,min hmu fuh awm sela chu mahnia nui ta vur vur chu mak min ti anga,mawl hmel min ti ngawt ta ve ang.Mahse zawlkhaw tuai tir tumahin an la khawih chhiat loh leh thianghlimnaa khat chuan min hmangaih thu min hrilh miau a,lawm lo chi ka ni lo a,lawm avanga nui vur vur lo chi pawh ka ni hek lo.Rei pawh ka kal hman lova ka in hriat lai chuan kan in chu ka thleng ta der a.Kan in te chu a vul thar ta vuk te hian ka hmu nia mawle.He tleirawl hi ka lo va ngaizawng nasa em em ve mawle tih chu ka in hre chhuak uaih uaih mai.

Ka room ah chuan ka lut nghal vat a,ka inthlak nghal zung zung a,zan danga ka tih dan ziah thin angin ka computer hma ah chuan ka thut leh vat a,zanina ka hun tawn nen hian a in mil zia hria in Carpenters hla Top of the world ngei mai chu ka ngaithla nghal vang vang a.

Such a feelin's comin' over me
There is wonder in 'most ev'ry thing I see
Not a cloud in the sky, got the sun in my eyes
And I won't be surprised if it's a dream

Everything I want the world to be
Is now comin' true especially for me
And the reason is clear, it's because you are here
You're the nearest thing to heaven that I've seen

I'm on the top of the world lookin' down on creation
And the only explanation I can find
Is the love that I've found ever since you've been around
Your love's put me at the top of the world

He hla hi ka tan an phuah ani chiang mai tiin mahni leh mahni chu ka infiam vel anih chu.Lawmna hian zanin chu min va han hual chiang em.Chutah ka phone chu ka lek kangin Zuali chu ka be ta a."I mu tawh em?hei ka thleng chiah aw" tiin.

"Mu lo e,iva thleng hma ve"
"Nia,zanin chu ka ke pen hi a zang tlat anih chu..he2"
"Hmmm..i sual e mai a,zak theilo min ti em?"
"Ti teuh lo mai,ka lawm veng veng"

Chutah tak ang reng tak hian ti hian min rawn be leh a

"U mawite, tumah mipa hi ka la ngaizawng ngai miah lo,nang pawn i hriat kha.Mahse maw,nangmah hi ka hmangaih che a,ka duh lutuk che,chu chu zanin khan zak chung chungin ka hrilh tawp che anih kha,min hmangaih ve tak tak angem?"

He thu kan chhiar zo chiah mai chu(h) ka kut te hi a khur dur dur thei nia mawle,thinrim avang leh hlauh avang chauh hian tha hi alo khur bik lo.Lawm lutuk avang pawh hian alo khur dur dur thei nia. ka thin hi a phu dup dup a, a nuam veng veng hi ani mai.Chutah phur fahran chuan ti hian ka chhang let ve leh a.

"Zualte,ka hmangaih tak tak che.Keipawn ngaihzawng mumal ka la nei ngai bik lova,nang ka hmuh tan ni che kha kum thum dawn a liam tawh a,khata tang phei kha chuan hmeichhe dang hian ka rilru an luah tawh lova,nangmah chauh hi ka ngaihtuah thin che asin.khawngaihin ka hmangaih che tih hi min rinhlelh sak suh aw" tiin.

"U mawite,ka ring ngam che,min hmangaih ve avangin ka lawm lutuk aw" a rawn ti leh a.

Hemi zana kan in message na hi tun thleng hian ka la save a,ka paih phal mawlh lo a ni.A tak tak ah chuan ngaihzawng pahnih khat vel chu zuali hma hian ka nei ve tawh a.Mahse zuali ang em em hian ka la serious hran lova,mahse zuali erawh zawngin ka nun ah hian bu a khuar nghet tlat.Ka hmangaih tih hi ka ringhlel lova,ka pawm thlap.

Tichuan khami zan atang khan nula leh tlangval inkara in hmangaina leh in ngaihzawnna chuan Hmangaihzuali nen chuan min phuar khawmin min suih nghet ta a.Chu chuan lunglenna alo keng tel zel ani tih te chu ka hre chhawm chho a.Kan in thlahlel em em a,nidanga kan in biak let teh meuh mai in biak a ngai chho ta a.

Ka fawh hmasak ber tum te kha aw,a birthday anih avangin dinner ka treat ang che ka ti a,a chhungte phalna thlapin ka chhuah pui a.dar 7 velah an in ah ka haw pui leh a,a chhungte chuan min lo be luam a.Nuam kan tih leh tih loh te,min lo zawtin min fiam hlut hlawm a.Eng eng emaw kan ti ti ho hnu chuan dar 9:30 velah chuan min mutsan ta hlawm a.Mitmei ven tur kan nei ta lo bawk a,zuali nen chuan Tv en pahin insi chet in ka thu dun a.

Chutah "maimitchhing la,i kut rawn dawh rawh le" ka ti a.Nui ver ver paha "enge" ti chungin a kut a rawn dawh a.Ka kekawr ipte atang chuan a birthday present atana ka hla phuah sak chu a kut ah chuan dah sakin "meng rawh le" ka ti a. "Uii enge a" tih pah chuan a chhiar zui nghal a.A chhiar zawh chuan ka mit a tak chiang taka min en chung chuan "U mawite,ka hmangaih che ka lawm lutuk" a ti a.Chutah kei chu ka bulah chuan kuai awnin a hmui sen no chek mai,tu mipa mahin an la fawh loh chu ka fawp ta! chhei, a thlum dek dek ni ber hian ka hria,ka lo duhthawh mah mah a,a thaw a chham lek lek a,min nam sawn a.kan in en a,kan nui dun ringawt a.Mahse ka la duhtawk lo cheu,ka fawp nawn leh ngat a.

Khami zan te kha ka tan theinghilh theih ani tawh lova,mitthla ah hian chiang takin ala lang reng mai.In duh takin kan in pawm a,kan in fawp a,rinawm taka awm dun reng turin kan in chah dun mawlh mawlh a.Zan a rei a,an inah ka riak ve dawn te anih ngawt siloh chuan hun chuan min then hran a tula,kham lo tak chungin kan inthlah ta anih kha.

Ni a ral a,thla a liam a,kum pawh a liam zel a,tunah chuan zuali nen kan in ngawihzawnna pawhin kum 3 dawn ani ve ta reng mai.Kan chhungte ve ve pawhin min hre pawh dunin kan chanchin pawh an hre chiang em em tawh a.Kan in len pawh fo thin.Thianghlim takin kan in ngaizawnga vawitam tak kan chhuak dunin chhungte tello pawhin vawitam tak kan awm duna,mahse vawikhatmah mipat hmeichhiatna kan hmang loa,inneih hun atan aw kan ti tlat thin.

Zuali pawhin a zirlai te zir zoin hna tha tak a nei ve tawh a,kei pawhin mahni hna awm tawk vel ka nei ve tawh bawk nen,nupaa insiam pawh kan sawi dun zauh zauh tawh a,kan hlim dun thin hle.Kan chhungte ve ve pawh kan hrilh dun tawh a,tu chhung te ve ve mahnin harsatna min siam lova,an phur em em zawk a ni.Chuti anih tak si ah chuan ka tih tur chu palai tirh chiah ani ta.Zuali nen chuan kan sawi dun leh a,kumin chu thla li vel emaw awrh chauh a awm tawh bawk a,nakum lama innei turin kan tin tuah ta a.

Hun chu a kal muang ka ti em em a,zuali nen nupa nih vat vat chu ka chak tawh hle a ni.November thla ani a,thlasik rim a nam chho tan viau tawh a,boruak pawh a nuam tawh hle.Tuk khat chu ka thianpa Puia hi kan inah a rawn lut hlawl a,a computer a chhiat avanga siam pui lawk turin min ngen a.A bike a rawn ken tho avang leh min thlah leh a tum tho avang chuan kan in phur phei ta a.An in kan thlen hma lawk chuan kan lam pana chak taka rawn tlan car chuan min rawn su thuai mai a.A thim mup a, engmah chu ka hre chhunzawm tawh lo.

Ka harh leh meuh chuan damdawiin khum ah chuan ka lo mu a,ka khum bulah chuan ka nu leh ka pa ka naute ho chuan min lo kil thap a,an lo tap per pur hlawm a,chutah chet kan tuma ka kawng leh ka kap bawr chu a na em em mai a.ka che thei ta ngang lo a.Chutia ka awm vel lai chuan Zualtei pawh chu a rawn thleng ve mek a, min hmuh chiah chuan a hmel ah chuan hlauhthawnna tam tak a awm nghal a "U mawite,engtin nge i awm? i tha em" a rawn ti zung zung a.Kei chuan "Zualte,keimah chu ka harh vek a,mahse ka kawng leh kap bawr hi a na deuh a" ka ti a. "U mawite, hlauthawng suh aw" min ti zui nghal bawrh bawrh a.

"Khawnge puia,engtin nge a awm" ka ti a, ka pa chuan "a ngalh ruh a tliak a,a nak ruh kha a sawh auh deuh bawk a,zai turin an nawr lut tawh,a ngaihtuah awm loh e" a ti a.Ka rilru chu a hahdam hiai hiai a, kan accident dawn lai vel ka mitthla ah a rawn lang uaih uaih a,kan thi lo chu vannei ka in ti ngawih ngawih a.zawi sap in "Lalpa,ka nun min la chelh avangin ka lawm e" ka ti a.

Chutih lai vel chuan nurse leh doctor chuan an tih tur an ti nghal zung zung a,kei pawh chu zai nghal turin min ti a.X-ray leh thil tul dang te kan tih hnu chuan ka kawng kha ka lo sawh auh deuh a, ka kap na ka tih kha ka tilmu ka lo sawh khawlo alo ni a.Tichuan keipawh chu min zai a ka tilmu pakhat chu min paih sak ta a.Puia,pawh a ngal ruh tliak chu tha takin an zawm sak a,amah pawh a harh a.Hun eng emaw chen damdawiina kan awm hnu chuan in lama in enkawl turin min chhuah ta a.Kan damdawiin awm man leh kan inekawlna senso zawng zawng chu min su tu chuan a tum vek a.

A inthiam lovin hrehawm a ti em em,ka chhungte hnen ah leh ka hnen ah pawh vawi tam tak ngaihdam min dil a.Office kal lai ve tho anih avangin a office ban leh a hun awl neih apiangin min rawn kan a.A tih sual vang liau liau a,min su anih avang leh heti tak maia a inthiamlo hi ka khawngaih em em a,Pathian hmingin kan ngaihdam thlap thu kan hrilh a.A lawm em em a,Puia te chhungkua pawhin an ngaidam a,mahse puia bike erawh min su tupa chuan siam that vek a tum luih talh avang chuan an dang zui duh ta bik lo a.

Hun engemaw chen ka hmuh tawh loh hnua kan in ka hmu leh ta chu ka hnuk te pawh a ulh hial a.Ka natna ka ngaihtuah chhuah phei chuan ka hma hun tur chu ka ngaihtuah zui ngam lo a ni.Zuali pawhin min ngaihtuah em em a,damdawiin ka awm chhung zawng pawn min tlawh awl lova,ina kan in enkawl hnu pawhin ka ei chak zawng leh ka mamawh tur nia a rin nen min kan reng a,chaw ei nghal mai chang pawh a nei tam hle.Min ngaihtuahna leh min hmangaihna ka hmuhin ka lawm a,ka ngaia ka hmangaihna a zual tawlh tawlh mai.

Khum a hun han hman tak tlawk tlawk mai chu a hrehawm duh khawp mai a,han len khawthawn vel pawh ka chak ve em em thin a,mahse ka thei rih silo.Nikhat chu ka room tukverh bulah chuan chair ah chuan awn takin ka thu a,huan thing zara sava nupa fu thiang rial mai chu ka thlir tlawk tlawk a,a pa niawm tak an thlawk sawn zauh a,reilote hnu ah a nu bulah chuan a rawn fu leh a,in ngai niawm tak hian an han in ngheng ve zauh zauh a.Heng sava te hi chuan nuam ti takin an duh ber te nen hun an hmang thei a,tumah dang reng an ngai silo tih te ka ngaituah neuh neuh a.

Chutia ka thlir lai chuan mahni in khawngaihna leh ka chan te,ka hma lawka nupui nei tum tawh kha heti hi ka nih tak si ah chuan nei theilo dinhmun ah ka han in chan thin a,lo innei ta tehreng pawh nila fanau rochan kan nei thei dawnin ka hre silo.Lungngaihna leh hrehawm tihna chuan min rawn zem ta.Ka mittui a tla zawih zawih a.Lungchhe em em chuan ka tap ta zawih zawih a.Ka tah rin chuan ka chhung ten an hria ang tih ka hlau si,ka lukham chuan ka hmai ka hup a,ka theih tawpa nasa chuan ka tap ta zawih zawih a.

Hmangaihzuali

Vawiin lamah hah hnap in zin kawng thui tak kan zawh tawh a, zanin chu tui taka mut bawrh bawrh hun anih vei nen ka mut reng a chhuak ve thei tlat lo.Ka thiante pahnih lah chu tui takin an muhil bawrh bawrh tawh mai si.A awm ka tih pui a,mut bawrh bawrh hun pawh ani tawh reng a ni,zan dar 12 a pel tawh alawm.Kei erawh chu Shillong boruak vawt nuam ang reng tak ah chuan kan thlenna guest house nuam tak kawt vel ah chuan cigarette zuk pahin khaw thiang nuam tak mai chu ka thlir vang vang a,van boruak a thlasik kawng paw zam chiai mai te, arsi lang pe un mai leh thla chanve lam eng pap mai te chu ava han mawi em.a khat tawk chuan ka awmna sira far thing ding sung chuan an rim an rawn chhuah cham cham reng bawk a,kan thlang kawngpui ah chuan khasi tlangval zan leng haw lam chu motor chuan chak zet zet in an tlan fua fua a,mahse chung te chuan ka rilru an la peng lova, vawiina pasal nei mai tur Hmangaihzuali ngei mai chu ka rilru ah a cham tlat mai.

Kan in hriat tan tirh khan pawl 12 zirlai chauh ala ni a, kei erawh chu BA ka zawh kum a ni thung.Ka hmuh hmasak ber nite chu ka mitthla ah hian chiang takin ala lang un un mai.BA ka zawh hlim khan hna mumal thawh tur mai ka hmuh rih loh avangin company pakhat ah ka in hlawh ve thin a,kan office awmna chu kawngpui an mai anih avangin kawnga kal chu an lang chiang em em thin.Tlai khat chu tih tur em em kan neih loh avangin kan thawhpui pakhat nen hian veranda ah chuan mi kal vel chu kan thlir mai mai a,school naupang rawn bang sap sap chu kan lo thlir reng a, inti nula tlangval tantir vel an nih hlawm avang chuan an kawng kal vel chu nuih uarh uarh pah chuan an in chhaih ve har har hlawm a.

Ka thiannu nen chuan kan nui duh rah rah a,chutia ka thlir reng lai chuan a hnung lamah chuan hmeichhe tleirawl pahnih hi an rawn kal dun hnak hnak a,kan lam hnaih zawk ami chuan ka mit a la rang hle mai.Pathianin mipa kawpui tura a siam leh duhawmna zawng zawng nei tura a duan chu chu zawlkhaw tleirawl tir chuan ava pumbilh chiang ve.A Mitmeng fiah kak mai chuan mipa inti tam tak hi chu ava han melh lai nasa rua dawn em.A sam mam taka khuih pial leh dicipline a nei tha tih hriat taka chhing taka a tawn vah mai chuan tleirawl lerh tak leh thle mai mai anih loh zia a ti lang nghal a,a hmai mam tak mai te,a hnar ngul sang vah mai leh min han fawp thut mai sela chuan mur nghal sung sung tur khawpa mawi a hmui te chuan makeup a hmang lo chung pawn a mawina an pho chhuak chiang teh e.

Chung a hmelthatna ti famkim tur chuan a sikul uniform fai tak mai khu ava han in hmeh leh zual em.Ka thlir ngawih ngawih a.Ka thiannu chu ka kawh hmuh vat a "Siamte, enteh khu tleirawl khu ava han hmeltha em em ve" ka ti a.Ka thiannu chuan "Khawi khu maw" a ti a,kei chuan "khulaia tleirawl pahnih kal zinga kan lam hnai zawk khu" ka ti a. Siamtei chuan "Anih khuu,uiii a nu reuh top" tiin a rak chul a, a tawng ring si,"I tawng ring lutuk" tih pah chuan ka nuih a.Tleirawl pahnih chuan an hre pha ni ngei tur a ni an rawn hawi chho a, chuta tleirawl hmeltha zet mai mit leh ka mit chiang zeta kan han in tawk chiah mai chu ka tek deuh chuai hian ka hria,ka en reng avang chuan a zak tih hriat tak hian a hawi let nghal vat a, a thiannu nen chuan min kal pel ta a.An lan theih chhung chu ka thlir vang vang a,a kal dan atang chuan mahni in ringtawk tak ani tih pawh ka hai lo, tichuan an kal liam ta a.

A tawi zawngin sawi tawh mai ila,khami ni atang khan tlai tin a sikul bang chu ka lo thlir ziah thin a,hmeichhe tlirawl tan tir chuan chuti taka lo thlir thin tu chuan hmeltha ka tih ani tih a hai bik ka ring lo.Mahse hmeltha tih in hre takin in duh hmel erawh a pu ngai hauh silo.Tlai khat chu amah chauha alo haw chu ka hmu fuh a,rang takin kawngpui lamah chuan ka tlan thla vat a, a hming leh an veng ka zawt ta chawt mai a.Chuta a zak a hmai rawn sen ap ap chu alawm ava han hmeltha chiang em, chutah ka mita chiang taka min en chung chuan a hming Hamngaihzuali anih thu leh chaltlang veng anih thu chu min hrilh ta a.Ka va han lawm em,kei pawh chuan ka hming chu ka hrilh nghal a.

Chumi ni atang chuan a remchan dan ang ang chuan ka be chho a,mahse sikul la kal lai anih avang erawh chuan ngaihzawng lam chu ka sawipui ngai lova,amah pawh chuan min nel em em tawh a.A zir lai lama harsatna a neih ang ang te pawh min zawt ve thin a,ka thiam ang tawkin ka theihna laiah pawh ka pui ve bawk thin.An in lamah erawh chuan rim en ah ka en loh avangin ka leng ngai lova,phone hmangin kan in be mai thin. Hun leh ni te chu a liam ve zela tunah chuan zuali pawhin a zirlai tha taka passed in college a rap ve tan tawh a,sikul uniform ha tawh lova in cheina dang a in bel te chuan a hmelthatna a ti zual tulh tulh mai.

Nula hmetha tak leh fel tak anih avang chuan ngaizawng tu pawh an tam na ngiang mai.Ka bulah chuan engkim hi min hrilh thin a,a then phei chu duh loh tak tak te pawh a nei ve a,mahse a ti lang lem lova,tawngkam mawi takin a thlah thin.BA a final kum anih tawh avangin amah pawh a puitling tawh hle a, lehkhathiam thei tak anih avangin leh thil thlir zau leh in zir zau mi tak anih avangin engpawh hi sawipui ila a hre em em zel a,ka ngaisang ru em em thin.Sum lamah pawh chhungkaw awmthei tak an nih avangin an buai lo viau a,mahse chuti chung chuan incheina leh tle reuh ah hian a duh sang em em hran lova,simple leh fai tak hi a duh ber ani fo a,duh ngat sela chuan thawmhnaw man to leh tha ber ber chu lei thei chu ani chiang e.Mahse chutianga khawsak erawh a duh lo thung.

Hun a liam a,ni a ral zel a,zuali te in ah pawh chuan ka leng ve zauh zauh tawh a.A chhungte nen pawh kan innel viau tawh a, kan in kar ah in ngaihzawnna lam thil an hmuh loh avang chuan min ring em em a.Inpawh tlang takin kan ti ti ho bawrh bawrh thin.
zan khat chu zuali te in ah chuan ka leng a.A chhungte chu an lo chhuak vek a, veng dangah ah an chhungte thi an awm avangin an lo kal vek alo ni a.Ka hmel a hmu chuan a lawm em em a,eng eng emaw sawia kan ti ti bawrh bawrh a.

Dar 10 vel ah chuan haw ka tum ta a, an gate thleng chuan min rawn thlah a,chutia kal mai ka tum lai chuan ka beng bulah hian zawite in "U mawite,ka hmangaih che" a rawn ti sap a.Ka phu chiang ngei mai,chutiang thu min han hrilh ta chu ka lawm lutuk nge keimah zawk chu ka hamhaih vek a,ka tek deuh chhawk ni ber hian ka hria. Engtin nge chhan mai dan tur pawh ka hrethiam lo,ka thin te chu a phu deuh dut dut a, ka chhan vat loh chuan a zak ang tih ka hlau bawk nen "Keipawn,ka hmangaih che" kan ti let ve ta thuai mai a, chutih laia a lawm leh zak deuh bawk si hmel chu ka mitthla ah hian a reh thei tawh lo.Hmeltha ka sawi dawn anih chuan khawvel ah hian kha baka hmeltha kha ka hmuh ka ring lo a,ka sawi fiah thiam hek lo.

Kan ding dun vang vang a, sawi tur em em kan hre silo.Kei a mipa zawk leh a upa zawk pawh chu ka lai ti tih der mai a, ani lah a hmeichhia zawkin khatiang thu min hrilh kha a zak leh ta deuh nge,lai tih hriat tak chuan a sam a khawih neuh neuh a,min melh leh zauh zauh bawk a.Chutah muang changin "Zualte,ka phei phawt ang,ka thlen hunah ka rawn bia ang che aw" ka ti a."awle,min rawn be ngei ngei rawh aw" tiin min chhang a,tichuan kan in thlah liam ta a.

Champhai Lamtluang

6:00 Am

Ka zin pui tur pakhat zawk orrisa tlangval Deepak-a chu a inluah Tuikhahtlang atang chuan ka va hruai a, hmanhmawh em em in laipuitlang lam kan pan dun nghal a, chutah chuan philippines tlangval Henry-a chuan min lo nghak vah tawh a,Jeans kekawr leh jeans kawr pawl hi alo ha a, lukhumparh te reuh te khum hian a in luah kawt ah chuan min lo thlir vang vang a.Min hmuh veleh chuan kan lam rawn panin min rawn chibai a, a hmel en aiin a aw lah chu a sin ret a, a english hman danah chuan mizo ah hian tluk loh a ngah mai tih chu ka hai lo.

Tichuan kan han inhmelhriat zung zung a, a bag dum leh laptop bag chu motor hnung ah chuan a rawn hlang thuai thuai a, chutah a piah deuh a parcel chu a rawn chawi phei a,a chhung ah chuan cooker pahnih leh bowl(belthleng te) leh fiante (spoon) te, thlai thenkhat hi a awm bawk a.A eng atan chuan nge maw a tih le aw tiin ka in zawt a, ka nuih chu a za ang reng hle,kan zinna tur leh kan thil tih tur ka en chuan chutiang cooker a chaw chhum hman pawn ka'n nih hmel siloh a.Keimah ang bawk chuan Orrisa tlangval Deepak-a pawh chuan mak a ti ve deuh ni tur ani "eng atan nge i tih a sir" tiin a zawt ve vat a.Henry-a lah chuan "Chaw kan chhum ang chu mawle" a ti sam et a.Kan nui ho dar dar a,tichuan kan tum lam Champhai tlang dun lam pan chuan kan in khalh chhuak ta a.

Dinhmun in ang lo

Kan tlan pah chuan ti hian thil ka ngaihtuah mai mai a, ka zin pui te pahnih hi an thla khat hlawh tur ka'n ngaihtuah chhin mai mai a, nuaikhat ai chuan a tlem lo ang tih ka hre chiang a, ka hlawh hi khawl ta ila an thla khat hlawh pha ve tur chuan ka khawl viau a ngai ang ti chu ka hai lo.Mahse chu ti chung chung chuan min en hniam emaw,min hmusit lam reng reng min biak dan atang chuan a lang lova,an zawlpui ang chiah hian min ti ti pui bawrh bawrh ve mai a."Mizoram chanchin kan hriat chak ang ang kan zawt che anga,min hrilh zel dawn nia aw''min ti a,ka hriat ang chhun chu ka thiam ang tawka hrilh ka tum thuin ka chhang ve a.

Zemabawk Dai

Zemabawk dai motor zin vei vak ten tawngtaina atana an hmanna thin hmun ah chuan kan ding ve a,thingtlang lam kal tur sumo leh motor thenkhat pawh chuan tawngtaina an lo hmang mek a.Keini pawh chu kan ding ve a, enge kan tih dawn tiin min zawt a,kawng tluanna min veng turin Pathian hnen ah kan in hlan dawn nia ka ti a.Henry-a chuan "a tha hle mai" tiin min chhang a.Tichuan ka'n tawngtai ange aw ka ti a,Pathian hnen ah chuan ka thiam ang tawkin English chuan ka tawngtai ve a,ka tawgtai zo ka'n amen chu ka thiante pahnih chu kan en a an phone chu tui tak hian an lo hmet dun mial mial a,ka tawngtai lai khan an lo maimitching ve hlek lo tih chu ka hre nghal mai a.Ka nuih chu a za ru ang reng hle a.Tichuan kan tlan chhuak leh ta a.

Thil lei indawnna 1 na

Seling kan thlen chhoh chuan bazara an thei zawrh vel chu lei an duh thu min hrilh a, thei man vel chu kan'n han zawt a, aman an chhiar aia tlawm dil tur chuan min hrilh zel a.Balhhla 80 mana an zawrh te kha 40 emaw 50 emaw a dil tur chuan min ti a.Ka rilru chuan thingtlang kut hnathawk tu ten a sur asa hnuai ah hah thi kulin an thawk a, nangni thlakhata  nuaih chuang la chuan enge maw in dil tlawm vak vak le ka ti a.Cheng sawm vel leka tlawm tur chuan a zuar tu te chu ka rilh zel a, an mahni bulah chuan aia tlawm chuan an phal loh thu ka hrilh nghal zel a. An ei chak zawng ngang ani ve bawk a,an lei ve leh mai a.

Thil lei indawnna 2 na

Kawlhkulh kan thleng chho leh a, Henry-a chuan lakhuihthei lei a duh thu mih hrilh a, lakhuihthei man chu ka'n zawt a,pum lian lutuk lem lo hi 80 an lo ti a.A man kan hrilh mai chu mak a ti hle a,whaaaaaaaaat? tih pah chuan a lakhuihthei chu an lek kang a,80 man a phu lo hrim hrim 40 man vel ni awm ani."Thil ava han to em em ve a" nui sun sun pah chuan a ti a."Tunlai hi lakhuihthei van hun lai ania,a awm chhun chu a to lo thei lo alawm" tiin ka chang a.An en nawn leh thin a tawp ah chuan "ka ei chak viau na a,ka duh aiin a to e mai ka lei lo mai ange" tiin a dah let leh a.

Ka rilru chuan kan Mizo officer leh officer kher lo pawh mizoram pawn hmun danga kan kal re re in kan ei chak zawng leh duh zawng chu tlemin to deuh hlek mahse kan leiin kan ei nghal hmiah hmiah hmiah zel a.He philippines pa a thlakhat hlawh pawh nuai chuang hi chuan a awm tawka a hriat loh chu a lei lo ngam tlat.In ren chem na lamah ah hian amah atang hian zir tur kan va ngah em.

Chhuan tur ka nei lo

Tlan pah chuan ka ti ti zel a, Deepak-a chuan mizoram hi a tlangpuiin enge in sum hmuh chhuah na ber mipui tam ber hian enge an tih tiin min zawt a, kei chuan kut hnathawka ei zawng kan tam ber thu ka hrilh a, "anih leh chung in thlai thar chu hmun dangah in thawn chhuak em?" tiin min zawt leh a.Chutianga thawn chhuah em em kan neih loh thu leh mahni ei tur an thawh tlangpui thu ka hrih a.Thawn chhuah hrim hrim kan neih leh neih loh min zawt a,kei chuan sawhthing,hmunphiah leh mau hi kan thawn chhuah tam ber anih thu te ka hrilh a.Ka rilru chuan chhuan tur leh mizoramin pawisa kan thawh chhuah tlem tur zia ka ngaituah a,ka zak ru ang reng hle mai a.He ka zinpui te pahnih hian mizorama an khawsak va na ber aizawl an han thlir kual a,kan incheina san zia te,kan motor neih nalh hlawm zia leh kan in leh lo lian pui pui te an hmuh hmaih bik silo.An rilru te te chuan mizo hi min dah sang vak in a rinawm loh.


Tawng inzirtirna chu

Kan tlan zel a, mizo tawng min zirtir rawh an ti ta.Number atangin kan tan ta pakhat,pahnih,pathum chhiar dan atang chuan kan in zirtir tan ta a.Henry-a chuan kan thil leina vel atang kha sawmli leh sawmriat vel hi alo hre fuh ni ngei tur a ni.A awmzia ka hrilh hnu chuan a lam dan a zir ta tiah tiah a,ka nuih an ti za ngei mai.Deepk-a zawk hi a rilru chak zia ka hmuin ka hria Vawithum li vel Number pakhat atanga sawm thleng mizo tawnga ka sawi hnu chuan a sawi chhuak ve thei mai nia! pa rilru chak tak zawng ani.Henry-a erawh champhai luh dawn thlengin sawmli leh sawmriat kha ala hriat pawlh ta zel a.Tih ngaihna a awm hlawl lo ani ber.Zin kawng ringawta in zir tir tur chuan a hahthlak lam a ni.

Chhun chaw/Chaw chhun

Ril a tam veng veng tawh a,keini mizopa zing chaw ei thin tan chuan dar 12 ah pawh chaw la ei lo chu hriatthiam a har tlat thin.Khawi ah nge maw chaw kan ei dawn le champhai hotel ah min ei pui an tum em mawni le tia ka ngaihtuah lai chuan champhai luh hma hret chuan Henry-a chuan kawng sir hmun nuam laia din chu a rawt ta.Tichuan a hnunga a parcel dah chu rawn la chhuakin "hetah hian chaw ei ang u" a ti ta mai.Chaw kan chhum chawp dawn ni maw tia ka ngaithuah lai chuan a cooker chu a hawng a, chaw chu alo chhum sa diam chu ni in. a belthleng (bowl) keng ah chuan chaw chu a khawrh diat diat a, chaw ah chuan bal ang reng tak thil thlum zet hi a telh bawk a.

cooker dang pakhat chu a hawng leh a,he thil hian alawm ka nuih ti za ta chu.Cooker chhung ah chuan brokoli,changkha,iskut leh mai hi hmin chiang mang hlei lo hian a lo chhum pawlh vek mai chu niin.Chawm tur ka'n zawng deuh a,eng mah reng reng a awm silo.Artui chhum sa hi a bag atang chuan a rawn phawrh leh a,hmarcha um hi bur pakhat ah hian a dah bawk a,chung zawng chu kan chawhmeh neih chu ani ta.

Tichuan champhai dai ah chuan chaw dai dek duk leh thlai hmin chiang lo chhum leh artui chu puar tak chuan kan ei ve ta lawp lawp a.Ka pian a hnu lama chawhmeh ka ei tawh a zawng ah chuan ala tui lo ber awm e.Henry-a lah chuan inti thei takin a tui em?tiin mn la zawt zui, "tui lutuk,i siam thiam hle mai"tiin kan fak der a,lawm takin a nui deuh var var a, tui ka tih loh zia chu hria se chuan a nui var var lo tawp ang chu.


Indawn 3 na

Champhai leh a chhevela kan tih tur ang ang te kan tih zawh hnu chuan,Champhai khawpui atanga eng emaw hawn an duh thu min hrilh a,Blanket a tlawm tih thu te an lo hre ve ni ngei tur a ni.Blanket lei tur chuan dawr pakhat ah kan lut ta.Henry-a chuan a duh zawng ang chu a lei nghal mawlh mawlh a, kan thianpa Deepak-a erawh India ze ngai bawk a chhuah leh ta.A blanket lei tum kha 1000 man ani a, 700 in kan han dawn nghal ngawt pek a, an lo phallo nasa maia.

India ram dang ang anih loh zia thu ka hrilh hnu chuan 800 talin dil ang ati leh ta.A va han manganthlak thin em! ka theih ang tawk leh ka thiam ang tawka ka dil pui hnu chuan dawr neitu te chuan "900 in la mai rawh u, hlep kan nei lo mai ang,900 hi kan lakna rate ania" an ti a.Tichuan 900 chuan la mai turin ka hrilh a,mahse thil in dawnna hmunpui Idnia rama cheng ani zia a lan tir leh ta 850 talin ala ti fan a, a theih loh zia ka hrilh a haw vat vat chak tawh nen, thin a rim tun tawh a.Ka ning ta deuh chuan i duh dan danin dawn ve tawh mai rawh tiin motor ah chuan ka luh san a,motor chhunga lo awm henry-a chuan engti zia nge thil pakhat lei tura darkar chanve dawn a hman a tiin min lo zawt a.Chanchin kan hrilh zung zung a, anuih a za ngei mai.

An in biakna thawm chu motor atang chuan kan lo ngaithla a,850 min pek chuan dam chhungin ka hre reng tawh ang che u te a ti ta ang nawk nawk a.An theih ngang silo,a lei tupa tur lahin a awt bawk si a tawp ah chuan lungawi loh hmel zetin 900 chuan ala ta hram a.A mangan thlak teh e.

Lung a leng

Tichuan Champhai khawpui chu dar 3 velah kan chhuahsan thei ta hram a.Kan haw kawng ah chuan romeiin tlang a bawh pawt chuk mai te,kawng kama fartuah leh vaube lo par tan tir mawi em em mai te,lo lama ei zawng tuten kumin atana an lo tur an vah tawh sa an lo hal alh hluah hluah a.Kawngkam vela an lo hal veng tu thenkhat tlangval leh pa ho lo thu khawp tai mai te, nu ho em phur chunga an haw diah diah ka hmuh te chuan,kei naupan lai zawng zawng leh rawllai nun thingtlanga hun lo hmang ve tawh chuan ka lunglen an kai tho nasa ngei mai.Chu mai ala ni lo khua a thim hnu chuan lui dung velah mei chher nen chhengkawl khawrh leh,sangha man ten lui dung an han zawh dam dam ka hmuh te chuan hmana ka lo tih ve thin tawh tho anih vangin nun hlui min ngaihtuah tir a.Ka thiante pahnih hian engmah lah an hrethiam ve silo.Kei lah ka lung a leng em em mai si.


Mangtha u le

Tichuan tluang takin kan tlan zela,zan dar 10 vel ah chuan Aizawl khawpui chu kan lut leh ta.Kan inthlah dawn chuan zin ho nuam an tih zia te min hrilh chiam a, remchang hmasa ber ah zin ho leh ngei turin kan in mangtha ta hlawm a.

Ka Bialnu hlui

Hmuifang tlang kan thlen chuan zunram thiar pahin kan zi mar ar ar a, khaw nawm chhoh hun lai ani bawk a, hmuifang tlang thli thaw heuh heuh nen, thingkung ding sung mai leh a hmun tlawha mi chi hrang hrang hlim taka an awm vel hmuh chu a nuam hle mai.Chutia ka hawi kual vel lai chuan ka thiante pahnih chuan "saw nu chu ava chhelo e,mahse nu ani tawh hmel sia hits vak lo" an tih ri chu ka hria a, kei chuan ka thianpa johna dar chu ben thak pah chuan "khawi maw, in lerh dun bawk sia aw"tiin ka nuih var var a.

Johna chuan "a lerh loh ber pawn hmuh i chak tho hi, saw sumo hma chiah a car var bula ding nau pawm saw mawle" a ti a. Kei chuan " a hnung lam ringawt atang chuan a chhiat leh that pawh hriat ava har si ve" ka ti a. "Lo en rawh, an pa sawn thil a lei a, a nghak lawk anih saw" a ti a.An pa an tih chu kan en a palian ngo ve vuah tak khawi lai officer lian tak emaw anih loh vek chuan contractor emaw sumdawng lian tak chu ani ngei ang tih hriat tak mai hi ani a.

Chutia kan thlir reng lai chuan chu nu chuan  motor luh tum chuan kan awmna lam chu a rawn hawi a, Ekhai ooo,ka hriat hnu a ni ka ti, ka hre chiang  mah mah ani, ka phu deuh zawk a. Tichuan motor ah chuan a lut ta a.Ka thiante bulah chuan "A chhelo  em anih kha mawle" tih pah chuan ka nui var var a.Thianpa "Zora chuan kha kha ani mai ang,nu pawh nise nula pawh nise chhelo hi chu ka hria alawm" tiin min rawn kuah pah chuan a nui ham ham a.Chumi te nupa pawh chu kan dinna lam pan chuan an rawn tlan chho a, chu nu chuan an fa niawm tak mipa naupang hi a hma ah chuan a pawm a, min tlan pelh lai chu ka lo thlir reng a,hlim em em chuan an nupa chuan an nui san san a.

Keini pawh chu thingpui dawr ah chuan thingpui te in in kan ti ti bawrh bawrh a, thingpui te kn in zawh hnu chuan ka zinna tur lam Lunglei lam pan chuan kan chhuak leh ta a.Johna leh zora chu a hmaa ah thuin zora chuan motor a khalh a an ti ti dun bawrh bawrh a,counrty music nalh tak tak playin an zawm dun rat rat bawk a, kei chu a hnug ah keimaha thuin seat chu ka kuai awn a, mut dar dar pah chuan eng eng emaw ka ngaihtuah mai mai a.

Ka thiante pahnihin hmeltha an tih dun em em kha ka bialnu ka duh em em thin ani tih reng an hre silo.Mahse hun liam tawh anih avangin hrilh kher erawh ka tum lo.Kei pawn hmeltha ka ti a,ka du em em thin kha a ni.

Ka la theihnghilh theilo,december thla ani a, tetei birthday thla ani.A birthday ah chuan awm ngei ngei turin min chah a,keipawh chuan ka ngaih pawimawh em avangin awm ngei pawh ka tum a.Tichuan ka ram riahna atang pawh chuan ka haw ve ta a.A birthday a ka present atan tiin zungbun ka neih ang tawka to chu ka leisak a.Zan lama an ina kal tur chuan ka inbuatsaih a.

Ka theih anga nalha in cheiin ka neih chhun thawmhnaw tha ber chu ka ha a,ka zungbun lei sak pawh chu ka ak than a.Tichuan an in lamah chuan ka kal phei ve ta a.A thian tha leh a hnathawpui thenkhat te pawh an lo awm sap sap a, in hmelhriat tirna te neiin kan in chibai kual a,kan in cibai lai chuan chempui ka hum tam avanga ka kut durh keh tawhin ka kut phah a tih chan hrup mai chuan office leh dawr thenkhata nitina hna thawk thin kut no tak tak ho chu kan chibai kual ve a.Ka kut chang hrup mai kha tumahin an hai lo ang.

Tichuan hun te kan hmang chho a, kan ti ti bawrh bawrh a, mahse kei nitina ramhnuaia hna thawk thin tan chuan khawpuia nitina chetla thin te nen chuan kan ti ti a in ang lo nasa em em a,an lawm zawng kha ka lawm zawng ani ve lo a, chutiang zelin ka ti ti duh zawng an ti ti duh zawng ani bik silo.Nuam lo tihna ka nei tan a, tin a hmei a pa chuan an rim a dik lo tlangpui a, tetei ngei pawh chu ka bulah chuan rawn thuin min rawn kawm a tum a,mahse ani pawh a rim a dik bik lo.A mit ah chiang taka enin ka'n be lui ngata min melh tha ngam lova a rul tawkin min chhanga mahse zu rim a nam tih chu ka chiang ta.Ka thin a rim em em mai a,haw nghal mai ka duh rum rum a,chiang taka zu a in na chhan hriat ka duh em avangin ka awm lui a.Eng emaw chen kan awmkhawm hnu chuan a thiante ho pawh chu an haw zo ta hlawm a.

Thiante an haw hnu chuan sitting room ah chuan kan pahnih chauh chuan kan thu dun a,"tete, enteh hei thil tha tak pek theih che ka nei lo a,mahse ka neih ang tawkin hei hi ka lei sak ve che anih hi.Happy Birthday" tih pah chuan ka zungbun lei sak chu ka pe a."Ui,ka van lawm tak" tiin ala a, a bawm atang chuan la chuakin "awi,a nalh tawp ka lawm lutuk" tih pahin min rawn fawh a tum a.Mahse kei chuan lo dangin "Tete,ngawi rawh lawk aw,zu hi vawikhat mah ka in ngai lova,ka duh loh zia pawh i hriat kha,ngati nge zu i in" tiin ka zawt a.A meng kun lap a,"zu pangai ka in hleinem beer mai mai alawm" ati a. "Beer mai mai maw,kei chuan mai mai ka ti ve thei lo" ka ti hmak a. "I strick lutuk anih kha,ruih nan kan hmang chuang hleinem,eng emaw nikhua ah beer chu kan in ve thin chauh alawm" a ti leh a.Kei chuan chiang kek kawka en pahin "Tete, eng emaw changa beer in duh chuan,eng emaw changin zu pangngai pawh a in duh tho ang,chu chu ka chiang" ka ti hmak a. ka thin a rim tawh khawp mai a.

'Enge i hriat a,thinrim na tur i zawn ri ngawt a,nang pawh rei deuh deuh min be lova,rei tak tak min awm loh san tho alawm' a ti a. "Tete,thinrimmna tur ka zawng lo,i thil in hi ka duh loh zia thu ka hrilh mai chauh che a ni, tin i hriat angin kei chu ram ah ka hna thawh avangin ka awm fo a,ka ei hmuh ve na tur anih miau avangin ka awm angai thin alawm,ramhnuai anih miau avangin be chak viau che mahila signal awm loh chang te a tam,i hriat reng kha" ka ti a.

Eng eng emaw sawiin ka lak ah chuan thinrimna chu a zawng ta zawk a,tin a tawngkam thenkhat ah chuan min hmuhsitna pawh a tel zauh zauh a,a zu in a rui anih ka ringa,tin ka chhan ve zel chuan in hauh buaina a thleng mai mai tih hriain chumi zan chuan rei tak pawh thu lovin ka haw san ta a.

Ka Thiannu Mami-2

"Mami, nie a zia lo khawp maia,i tawrh hi a hrehawm ang tih pawh ka hritthiam pui che.Mahse thil anih tur ang ang ani zo tawh a, i nu leh pate pawh thil awmdan tlang takin hrilh la,an fanu neih chhun i ni a an rilru chu ana viau anga mahse an hrethiam em em ang che.Mahnia tuar tlawk tlawk lovin hrilh tawp mai la, i rilru hrehawmna tam tak chu a reh hawk ang.Tin, nau tih tlak kha chu keipawn a tha ka ti lo bur a, ti tla lo la pai tlang law law la, a pa in a rawn ngaihven emaw ngaihven lo emaw nu leh pa leh unau i nei a, in chawm thei em em ang.Tin, tlang takin ka sawi law law ang,tun atanga kut thlak duh tu che hi damchhung atana i kawppui ah i nei ngam angem?A kut lo thlak tawh na che leh i rilru alo tih nat na erawh Pathian hmingin ngaidam la.Mahse kawp zui tawh suh.

Chuan ka tawngkam hi alo na ani pawhin i hrethiam turah ka ngaia a chhan chu ka thiannu i ni a ka hmangaih vang che leh ka duhsak em vang chein ka sawi dawn.Pakhatna ah chuan engvangin nge i chetsual pui, ngati nge i insum zawh loh.Pathian ringtu tha tak i ni a kan Pathian thu pawn a sawi angin kan tawrh zawh loh tur khawp thlemna hi a awm ngai lo asin.Pahnihna ah chuan i bialpa in sex kha duh mahse nupa nih hun atan i tih tlat loh,inthen hial duh mahse sex lama insum tlat Pathianin tlangval ringtu fel leh tha tak tak a ngah tih hi i in hrilh nawn fo loh a, ngati nge Pathian avangin i then mai loh?

Kei chuan hnem vak ngaihna che ka hre thiam lova, ka tih sak theih chhun che erawh chu kal la ti sual leh tawh suh tih kan Pathian thua kan hmuh ang khan sim hmak turin ka duh che a, Pathian hnen ah ngaihdam ka dil pui che ang a,theihtawin ka tawngtaipui ang che.Chuvang chuan tun atang chuan nun uluk takin hun hmang tawh la, i fa lo piang tur tuna i pum chhung awm mek dam taka alo piana fuke kima alo pian chhuah teihna turin ngaihhdam dil chungin Pathian hnen ah tawngtai la.Ani chuan a ngaidam che anga, a veng em em ang che.
Tin, mi thenkhat te anga nun beidawn avanga ruitheih thil tih leh khawvela nun hlimna zawn hi ti lo hram ang che.I ti anih vaih chuan a hma aiin i buai tulh tulh ang a, i hrehawmna a zual telh telh ang.Nun thlakhleh lohna in a zui che anga,mahni nun hial thlahlel zo lo khawpin in tih hlum duh na hial i nei mai ang.Chuvang chuan Mami tunah hian khua ala tlai lova i hman hun chu Pathian kut ah dah ang che.Inchhira sim te a hnar ngailo tih i hriat kha" tiin ka thiam ang tawk chuan hnemin kan fuih ve a.
A hmel chu kan en a, hnuai lam a bih ngar ngar a, a mittui chu a hru leh zauh zauh a a in sut faih faih reng bawk a.Zawi muanga rawn hawi chhuakin aw khur der der chung chuan "Nia a dik alawm, mahse han then tawp chu ka va ngai dawn.Dik tak chuan ka hmangaih hman em a, ka duh em a ni" a ti a.Kei chuan "Ni e,ka thiamlo miah chuang lo che, mahse i thu sawi tak zawng zawng atang khan a hmangaih let ve na che ka hmu lo a, i taksa mawina zawng hi a duh ni berin ka hria a, chuvang chuan then ngam turin ka duh che a ni.Pathianin hmangaihtu che mi fel tak ala pe em em ang che" ka ti a.

"Tluang, ni e har viau dawn mahsela i thu min hrilh hi a dik ka ti a, ka theih tawpin ka rilru ka lo siam ve dawn nia" a ti a.
"Tirawh mami, Pathian hnen ah i tawngtai ang aw" tiin heater chu ka nawr sawn a,chhuatah chuan thingthiin theihtawpin kan tawngtai dun ta.Mami pawh a rilru zawng zawnga tawngtaiin mittui tla zawih zawih chungin Pathian hnen ah ngaihdam a dil a,keipawn ka theih tawpin ka dilpui bawk a.Rei fe kan tawngtai dun hnu chuan kan zo dun thei ta a.Kan tawngtai zawh chuan "Ekhai,mami a ropui hle mai, kan tawngtaina te i ngaihdam dilna zawng zawng te Pathianin a ngaithla anga a ngaidam em em ang che"tiin ka chibai a. "Tluang, ka van lawm tak em ka lawm lutuk aw, tunah chuan ka theihtawpin Pathian rinchhan tlat chungin tawrh dan ka lo zir tawh ang" a ti a.

Sana ka'n en a, dar 2:15 alo ni tawh a, "Mami hei a tlai tawh khawp mai a,ka haw phei mai dawn mawni ka ti a,i riak ngam angem i hlau em" ka ti a. A ni chuan "awi,thingpui in leh phawt la" a ti a. "Ngai love,zan dang ah ni rawh se" ka ti a.Chutah a tho a,"ngawi lawk rawh aw" a ti a.A bag chhunga a purse chu la chhuakin Rs.500 chu a rawn phawrh a "kha hei hi la rawh, petrol man ah" a ti a. "Ngailo re re..i va ho tak,ka ti a" min nawr luih avang leh la hram tura min ngen nasat em avangin ka la ta hram a. "Tluang, ka lawm lutuk tak tak ka rilru hrehawmna te ka hrilh che a,ka thawl hawk in ka hria,keimahin ka riak ngam alawm,ka hlau lo e" a ti a.
Tichuan remchang hmasa bera leng turin min sawm a.Keipawn ka kal leh thuai tur thu leh rilru huaisenna nen a lo awm fan fan tur leh tawngtai tam turin ka hrilh a.Tichuan kan in mangtha ta a,In ka thlen meuh chuan dar 3 alo ni dawn thuak tawh a.mut nghal tumin khum lam chu ka pan ve ta nghal a.

HUn leh ni a liam zel a, Mami pawh chuan fapa duhawm tak mai a nei ta a.Ka lawmpui em em a,a chhungte pawh an lawm ve ngang niin ka hria a,an inah chuan ka leng lut fo a, a chhungkua chuan an hlimpui dar dar thin hle.Mami pawh chuan a bialpa hlui pawh chu a then fel tawh a.Mahse eng emaw chang chuan a ngaih thin zia min hrilh ve chamchi a, mahse a chet dan mawi lo tak te avang khan pasal atana han nei tur chuan ka hlauthawn pui avangin nei leh tur erawh chuan thurawn erawh ka pe ngai lo.

Mahse chuti chung chung chuan Pathian ah lawmna thar a chang a,a nun hlui sima ngaihdam a dil leh anih erawh chuan naute fahrah ai chuan ngaidama tha taka innei tur erawh chuan ka duhsak thu ka hrilh fo a,theihtawpa tawngtai pui fo tur pawn ka chah thin.Mami pawh kohhran ah pawh an lawm lut leh daih tawh a, a hmaa a tih thin ang bawkin a theih tawkin kohhran ah pawh a in hman chhunzawma ka lawmpui a,rilru hah avanga khawvela hlimna zawng mai lova Pathian ah lawmna tak a awm tih hre chunga Pathian a bel leh tlat chu ka ngaisanga ka lawmpui tak zet a ni.

A tawi zawngin sawi tawh mai ila, kum a liam a, hun a kal zela Naute kum hnih a tlin kum chuan Zorina pawh Pathianah lawmna charin tih tak zetin Mami chu ngaihdam dilin a hmangaih thu chu a hrilh ta a.Tichuan palai te tirin an innei fel ta a.Tunah chuan chhugkaw hlim tak dinin Fa pawh 3 lai an nei tawh a ni.

(He thu ka ziahna chhan chu, tunlai hian thlaite in ngaihzawnna chungchang ah kan kal thui mah mah thin a,pawi ka ti tak zet a.Sex hi nupa tan chauha siam anih ang ngeiin nupa nih hun atan chauha hmang tur leh nulat tlangval lai chuan thianghlim taka in vawng hram hram turin ka thalaipui leh he thu lo chhiar zawng zawng te ka chah duh che u a ni.)

Ka Thiannu Mami-1

Zan dar 12 a ri tawh a, ka muhil theilo chuan online pahin ka thiante thu post tha pui pui leh hmeltha tak tak te thlalak chu ka like thla diat diat a. Thenkhat hlimpui awm tak tak a tam laiin thenkhat erawh lainatawm tak tak te pawh an awm nuala, ka rilru chuan he facebook hi chu aw a tangkaia hmang tu tan chuan a hlawk thlak rual hian,thenkhat tan chuan hun khawhralna leh sum thuni nu hi ava ni chiang em ka ti a.Chutia ka ngaihtuah neuh neuh lai chuan ka phone chu a rawn ri ral ral a.Tun ang zan rei tawh lamah a tu chuan nge maw min la rawn phone le aw, tiin ka phone chu ka'n lek kang a, kan thiannu mami alo ni a.

Hello ka ti a, chutah lungchhe in hnit hlawp hlawp hian mami chuan 

"Tluanga, min tawngtaipui rawh" a rawn ti a.

kei chuan mak ti tak leh thlaphang tak hian
"Mami engti zia nge, ngati nge i tah" ka ti a,

"Ka rilru a na, hrehawm ka ti lutuk" a sawizawm theilo chu a tap hlawp hlawp a.
"Ekhai o, ava zialo ve, mami inti pachang hram hram la, thil awm dan kha chiang deuh takin min hrilh ta che"ka ti a.

In hnit hlawp hlawp chung chuan "aaaa..Tluanga,phone a sawi zawh vek theih pawh ani lo, khawngaih takin lo kal teh, a hrehawm e mai" a ti a.

Zan dar 12 a pel chu ani tawh a,han kal chhuah leh chu ka peih lo hle maia, mahse thian ten kei tehlul min mamawh anih si chuan kal chu ka remti a, kan veng atangin a hla lemlo bawk a " awle, ka lo kal ange" ka ti a, tichuan kan in biakna chu ti tawpin, kal tur chuan ka insiam ta a.

Thlasik khaw vawh vanglai ani bawk si a, thawmhnaw han inbel leh tura inthlak chhung lek pawhin a vawt em em mai a, room leh lama ka nu leh pa mu chu ka va kaitho a.Ka kal chhuah chhan tur leh ka kalna tur chu ka hrilh a, ka nu chuan a remti lo lek lek a, chutiang zan rei lama han chhuah chu nu tan chuan ka ngaihtuah awm reng a ni.Mahse ka pa chuan Ekhai, chutia ka fapa tehlul mamawh tu an awm chuan va kal rawh se, mahse "mapui fimkhur ang che o, kan lo tawngtaipui ve dawn che u ania" a ti a, tichuan in chu ka chhuasan ta a.

Chutiang khaw vawh vangalaia 2 wheeler a zana han chhuah chu a namai lo hle mai.Ka hmanhmawh lutuk na lamah ka kutkawr ka lo bun theihnghilh bawk nen, kut chu a a vawh lutuk avang chuan a na thum hian a hriat zawk hial a ni..Thawmhnaw in a khuh phak loh hlek chu a vawt zual nasa duh hlei hlei a, ka thianpa pakhat sawi dan takah hnap hi tawlh leh tawlh loh pawh a hriat hran tawh lo re re.Tichuan reilo te hnu ah chuan mami te in chu ka thleng ta a.

An gate chu hawngin a tual ah chuan ka scooty chu ka dah a, ka gate hawng thawm hria chuan pawnah chuan a rawn chhuak nghal vat a."Ui, tluanga ka van lawm tak, i fel lutuk lo kal rawh" tiin min lo lawm nghal chung chung a, tichuan in chhung ah chuan kan lut ta a.Sitting room ah pawh thu lovin a room ah chuan min hruai chho a, electric heater alo on sa chu ka pan nghal vat a, ka kut chu ka hem nghal sawk sawk,mami chu ka hma zawn chiah ah chuan a rawn thu a, a hmel kan en chian chuan a tah nasat luatah a mit te chu a bui deuh lak a, a hnar pawh chu a sen hlar maia.A biang dinglam chu a duk deuh ni hian ka hre bawk a.

Mami chuan "uii..tluang, hrilh tur che ka ngah lutuk ka rilru nat zia hi, thih daih mai te hi ka chak zawk" a ti nghal bawrh bawrh a. "Engti zia nge a, a hrim hrim in khawnge i nu leh pa te hi an awm a,khawnge i nau johna pawh hi a awm, a mu tawh nge a leng" ka ti a. "ka nu leh pa chu ka pa hnathawh na lamah nimin khan an kal leh tawh a, ka nau chu zanin hi an thianpa birthday anih avangin a riak nghal dawn a" a ti a. " enga maw i rilru natna ber chu, enga ti nge a" tiin ka zawt a.

"I maw, ka thianpa ka chass kha i hria em? Zorina kha" a ti a, kei chuan " palian ve lampang kha maw" ka ti a, " aw ni e, kha nen khan kan in zui rei ve tawh viau a, i bulah chuan ka in puang tlang law law mai anga, sex pawh vawitam tak kan hmanga kan in ngaia kan in thlahlel thei lutuk.Mahse, thla hmasa tawp lam khan ka ruak lo tih ka hre ta a. ka rilru hi a hah lutuk a, ka zak bawk si ka nun kha a nguai em em a, tumah ka hrilh ngam silo.
Inkawm pawh kha ka in kil tawih ngawih ngawih a Pathian ka zah si, chuvang chuan ka inkhawm ngai ta miah lova, hruaitu te pawh vawitam an rawn leng a, mahse chhuanlam eng eng emaw siamin ka lo pha zel a.Ni a liam a, ka rilru hahna leh ka nun hrehawmna chu a zual tual tual a, chaw pawh ka ei tha thei lo.Tih tlak mai ka duh a, mahse tualthat ka nih dawn avang leh keimah hrim hrim hian ka ngamlo" a ti a.

A thu sawi lai chu lo pawt chat in " I bialpa chu thil awmdan hrilh in,inneih pui ah i sawm law law mai lo ami" ka ti a. Chutah "ka la sawi zel dawn lawm,tichuan keimah hi ka in hua a, ka in ten ngawih ngawih a. Mi ten an hriat chhuah huna min hmuhsit dan tur te, mak min tih dan tur zawng zawng te ka ngaihtuah a,nitin hian ka tap hi ani ringawt inchhirin awmzia a nei tawh silo.Thalai ah khati khawp khan ka lo in hmang ve tawh si a, kohhranin min thunun ngei dawn si, kohhran mipuite an zahawm dan tur zia ka ngaihtuah phei chuan ka hrehawm tih zia hi sawiin a siak lo a ni.

Tichuan Zorina chu ka awmdan chu ka hrilh a, min hnem a hnekin ama fa anih a rin lo thu leh nupui neih ala ngam loh thuin min chhang ta anih chu.Aw,nau ka pai ringawt pawh hrehawm ka tih tawh teh lul nen,chutah amah berin a fa a nih a rin loh thu ten min la chhang ta deuh deuh a" sawi zawm thei loin a mittui a tla zawih zawih a, a tap zui ta, lungchhe em em in a tap zawih zawih a.Kei chuan amah chu kuahin "mami,inti pachang hram hram la, insum hram hram teh.Thil awm dan chu ka hrethiam mai a,theihtawpin ka pui dawn che alawm" ka ti a.Ka awm ah chuan a rawn bei thlawp a, "min hrethiam rawh, a hrehawm ka ti em a ni" a ti a.

Kei chuan a lu chu tuai heuh heuh pahin " Nia, a dik alawm,ka hrethiam che" ka ti a. a khuma a face towel chu lai in a mittui chu a hru hul niap niap a, ti hian a sawi chhunzawm leh ta a, "Tichuan zanin khan leng turin ka sawm a, zu rim a rawn nam nasa em em a, thil awmdan ka hrilh nawn leh a, ti tla turin min ti a, mahse ka ngam loh thu leh ka duh loh thuin ka chhang a, ka tih tlak loh chuan inthen a duh thu leh min biak tawh ngai loh tur thuin min chhang a.Tichuan haw a tum a, kei chuan la thu rawh, thil sawi chiang ang ka ti lawm lawm a, mahse kal a tum lui a, ka pawt bet a, a thinrim chuan ka hmai ah hian a hnek chawrh a,awi a nat zia chu a thim mup a, ka lu hi a hai nghal chuai chuai a, ka tlu tawp a.Min chhuahsan lui a,thei leh thei loin ka au tawk tawk a, mahse enga tan mah ngai loin min chhuahsan lui a" a ti a.

"Tluang engtin nge ka tih ang, ka rilru hi a hah a, a hrehawm ngawih ngawih ania" a ti a.Kei chuan thawk halh pahin amah chu ka en ngawih ngawih a, hmeichhe nu leh rilru no tak mai chutah pawh nau la pai leh nghal,chupawh midang fa pawh niloin ama fa ngei ani leh nghala chuti chunga kut hial an thlak chu zorina chu ka dem em em a, mami chu ka khawngaih khawp mai a

A TLAI ZO TAWH

Office ka thlen chuan ka dawhkan ah chuan Kan lehkha zirpui thin te innei tura sawmna card chu alo awm va mai a, kan en vang vang chuan thianpa zova te an lo ni a,ka nui suk a, ka rilru chuan kal ngei ngei turin ka inbuatsaih nghal tawp mai a.

Ani nen hian school kan kal lai zawng zawng pawh a in kawp leh hostel ah pawh room khata awm thin kan ni a,college kan kal khan kan subject lak a dan tak avang leh kan awm na hmun a a in an tak loh avangin kan awm dun thei ta lova, mahse chanchin a chhia a tha erawh kan in hrilh tawn reng a,kan in ngai em em thin.

Tichuan hun a kal zel a,hna kan han nei chho a, hmun hran hran ah min post tak si avangin kan in kawp tam thei lova, aizawla kan hawn remchan lai anih erawh chuan kan in tlawh awl lo.Thiantha nih a tling em em a, tuna nupui a nei tur pawh hi ka thinlungin ka lawmpui em em a, a nupui tur pawh hi college kal laia alo kawp tawh rinzuali nula fel tak a ni.

Ka phone chu la chhuakin thianpa zova chu ka'n be nghal a,"Hello, ekhai hotupa i sawmna card chu hei ka lo hmu e,ka ti hman chauh a, "I rawn kal lo vaih ange aw, i chak lovang, best ah hman che ka tum deuh a,mahse in hna lamah i tul lutuk tih ka hre sia, bakah keini inneih tur avang ringawta i hna a chawlh lak tir che kha ka in thlahrung a,hahahaa" aw zakhai tak chuan a rawn ti a. A ngeiawm a rawn chhuah leh tan tih ka hriaa "Nia, keini ang te chu i bula ding ka tih lai chuan "ngeiawm suh aw, ka tlawm tlawm" a rawn ti a,kan nui dun bawk bawk a, tichuan ka kal ngei tur thu ka hrilh a, a lawm thiam em em a, tichuan eng eng emaw sawi kualin kan in biakna kan ti tawp ta a.

Hun leh nite a liam zel a, thinpa zova te inneih ni pawh chu a lo thleng ta a,ka coat ka en kual lai chuan ka hna thar kan lawm dawn tuma thianpa zova min present amah nen kan thui dun tir chu ka hai chhuak nawlh a,ka mitthla ah hlim taka kan in teh tir lai leh kan nuih dun bawk bawk lai te a rawn lang a, ka lung a leng hle mai.Tichuan fai taka ka in bual zawh hnu chuan ka theih anga nalh in ka in chei ve a, perfume rimtui ka neih that ber chu ka in kap rim nam ham ham a, pheikhawk pawh fai nalh zaih maia nawh tlet chu ka bun a.Darthalang hmaa ah chuan a mopa tur ni awm zawka mawiin ka in en uluk hle a ni.Rei fe ka in thlek hnu chuan Biakin lam pan tur chuan ka chhuak ve ta a.

Biakin kawt vel ah chuan kan lehkha zirpui thin kan thian hlui te ka hmu nual a,ka inchibai a kan in be luam hlawm a, a then chu nupui fanu te nen an rawn kal a, thenkhat te pawhin an pasal te rawn hruaiin an fate nen an rawn in zui diah diah hlawm bawk a,vawiin thlenga kawppui la nei lo chu kutzutanga chhiar tham lek chauh kan ni tawh awm e.Mi te hmuh ah chuan tlangval senior nula senior kan ni ve der tawh mai.(Mahse hmuh zawh loh vang ani bik hauh lo ania..Hahahaha)

Tichuan inneih inkhawm chu tan a hun ta a, thinpa zova pawh a nalh hle maia, best atan chuan kan thianpa tho dinsanga alo hmang a,an in tiat tawk ren rawn bawka an in hmeh angreng hle. Tichuan monu pawh a rawn lut ta a, amah alo ngo sa bawk nen a kawr var fual thianghlim tak mai chu a nalhpui a, mopa nen pawh an in hmeh dun hle mai.Inneih inkhawm chu kan hmang a, zungbun in buntirna te neiin an innei fel ta a. Tunah chuan fanau maltluan chawi dun turin nupa an ni ta.

Inkhawm banah chuan thlalak puina te kan nei a,chutia thla kan lak fel hnu chuan midangin an lak pui chu ka lo thlir a,ka hnung lamah chuan min beng thek paha "I va nalh ve" tih ri chu ka hria a. Ka hawi let thuai a, ka va phu chiang em!tuhdang ni loin kum 10 liam ta ami ngei kha a ni.

A hmel chu khang hun lai ai zawng khan a tha ta emaw tih tur khawp hian a nung sar maia, a mitmeng fiah kak mai leh a hmel mawina tibelhchhah tura a hmui leh a hnar nalh em em mai te chu chuai lam ala pan lo.A puan bih te chu ava han inhmeh chiang em, a puan bih hi ka vawikhat hmuh ve na ani a, a pian a nalh em avangin a inhmeh chiang hle mai.

Kei chuan phawk deuh hlek hian "Eheee..i dam maw, kan va han in hmu khat ve" tiin chibai chu tumin ka kut chu ka pe nghal a,vawitam tak ka lo hmuh tawh thin leh mahse hun rei tak ka hmuh tawh loh a nui mawi tak chu ka hmu leh ta,nuih seih pah chuan a kut chuan ka kut chu rawn vuain kan in chibai a "Chutia mi, nang alawm vang" a ti a. A kut no leh nel thep mai chuan min ti tim sung sung thei dawn alawm mawle.Eng engemaw sawiin kan titi dun hlut a,tichuan kan in kalsan ta rih a.

Joint reception chu thianpa zova te biakin hall ah chuan neih a ni a, zaithiam zai leh thiantha te fiamthu thawh te chuan beng a ti tlai in kan hlim dar dar hle a, tichuan chaw te kan eikham fel hnu chuan nupa tuak thar te chu ka va chibai leh a.

zova chu ka beng bulah rawn kun hnaiin "Ilo hmu maw,in kal tur thu ka hrilh duh lo ve ve che u anih kha" a ti a, a nui uarh uarh a,"Misualpa, sawi tha ve hle hle ta che" ka ti a, min nuih nasa ngei mai,chutah ka coat hak chu a en chiang a " He thil hi ava lunglen thlak ve,ila dah tha char char elaw" a ti a, kei chuan buk nghat pahin " Dawn lawm ni, mihausa thil min present te chu ka paih phal i ring em ni" ka ti, nui sun sun chung chuan " Min hmusit tha duh lo e mai" a ti a. Tichuan haw mai ka tum tawh thu leh remchang hmasa ber ah chawi eia sawm vat ka tum thu te ka hrilh a, min la ui bet nasa viau na a, kan in thlah ta a.

Zanah chuan computer hma ah ka thu a,thlalak hlui tak tak kum 10 lai liam ta ami ho chu ka phawrh chhuak a, ka lung a leng thar hle a, vawiina ka hmuh-i nena kan lak pawh alo la awm a, mithhla ah nunhlui a rawn lang uaih uaih mai.

Bangalore ah pawlsawm pahnih zirin kan awm a, kan School kal na ah chuan mizo pawh kan tlem hle a, kan vaiin 15 emaw awrh chauh kan ni a, chu pawh chu class hran hran ah kan awm a, kan class ah chuan thianpa zova leh ka thhianu(Caroline) leh kei chauh chu kan awm a, kan in lungrualin kan in kawmngeih hlawm hle.

Nitina in hmua inkawm na na na chu Caro-i nen pawh chuan kan in be nasa khawp mai a, khang hun lai khan mobile phone hi mizoramah pawh kan la hmang uar em em lova, phai ah erawh chuan an nei fer fur a, phaia awm ta chu tiin chhungten keipawh min lei sak ve a, Caro-i te hi chu chhungkaw hausa tak an nih avangin phone pawh a neih changkang hle.

Caro-i nen pawh chuan phone chuan kan inbe nasa thin khawp maia, School chawlh ni te hian ni khatah sms 200 chuang te hi kan in thawn thin.Thian ang chuan in en mahila keimahni ah chuan in ngainatna a awm tih chu a tu ve ve pawhin ka hriaa, mahse kan inhrilh ngam lo ve ve thung a,chutia induh ru ve ve nia ka in hriat avang chuan a mipa zawk ka nia lawm le tiin bul chu ka tan a.

Zan khat chu ka ngaihzawn thu leh ka duh thu te ka hrilh ta vek a.Min duh thu min hrilh let ve mai dawn emaw ka tih lai chuan ka rin loh dan deuhin min rawn chhang ta a,ka ngaihzawn avanga a lawmthu te,min phu loh thu leh ngaihzawng lam ala ngaihsak duh loh thu min rawn hrilh ta mai a.

Ka zak em em a, ka lo hrilh ta kha ka inchhir ngawih ngawih a, chumi zan atang chuan biak zawm chu ka tum ta lova.School vel ah erawh chuan kan inkhawm khawm bawrh bawrh tho a,mahse nidang ang em chuan kei chuan ka ngaihsak lutuk lova,mahse amah zawk chuan min be siam siam reng a, zanah lehkha zir lai te hian sms chu ninawm khawp hian min rawn thawn a, kei chuan a rul tawk te te hian ka chhang ve reng a, thiantha pangaia en ka tum tawh a.

Mahse hun a kal zela, sms chu min rawn thawn tlut tlut a, mipa tam tak tan chuan min duh ngawih ngawih anih hi tih tur khawp hian, thiantha inthawn aia thlum hian thu nalh pui pui leh hmangaihna lam hi a rawn sawi tam a, kei chuan chung hun lai pawh chuan thian pangai ang rengin ka thawn a, ka ngaihzawnna kha tih bo ka duh tawh vang a ni.

Kum tawp exam alo hun a, Pathian zarah tha takin kan pass hlawm a, thianpa zova nen chuan mizoram lamah kan rawn haw san ta rih a, ani erawh chu a nu leh pa te hna thawhna avangin a la awm zui thung a. Aizawla ka awm hnu pawhin kan in be ta zel a,a lunglen zia thu te, min ngaih thu te a rawn sawi cham chi thin.

Chuti taka min rawn biak nasat avang leh khawdang hawi thei lek lova min siam avang chuan min duh ve ta anih hi tiin, a hmaa lo ngaihzawn ruk tawh nen, zan khat chu min duh ve leh ve loh ka zawt nawn leh ta sak a, chumi zan pawh chuan a hma ang reng thoin ngaihzawng neih a duh loh thu leh in ngaihzawn a duh loh thu min hrilh leh ta a. Ka rilru a let tawh tak zet a, vawikhatmah tiang zawng hian ka be nawn leh tawh ngai lo ang tiin ka rilru ka siam fel ta a.

A kum leh ah chuan Delhi lamah BA zir zawm turin ka chhuka, chutah chuan ngaihzawng duh deuh mai leh fel deuh mai ka nei a,heng hun lai zawng zawng pawh hian Caro-i nen hian thiantha tak angin kan in be zel tho a, kei chuan thiantha pangai takin ka en tawh a.A harsatna leh a lawmna te min rawn hrilh chamchi a, keipawn eng eng emaw chu ka hrilh ve thin a, ka ngaihzawng neih erawh ka hrilh lo a, tul ka ti ber lem lo.

Zan khat chu ka in bual zo ka phone ka'n en chuan Caro-i message chu alo awm leh kalh a, kan chhiar chiah mai chu mak ka ti a,hrehawm ka ti letling hial zawk a. A message ah chuan ngaihzawng ka neih alo hriat thu te, min huat zia thu leh rinawm lo min tih zia thu te, tenawm min tih zia te chu a rawn ziak teuh maia, vawikhatmah min biak tawh lo tur thu leh a rilru nantzia thu te chu min rawn hrilh chiam hi alo ni a.

Khumah chuan ka thu a,mak ka tiin a message chu ka chhiar nawn leh ngat a, eng vanga rinawm lo min ti ve ta ringawt nge anih a, eng vanga a rilru chu alo nat ve ngawt nachhan chu ka in zawt a, a chhan ka hre lo a, mak ka ti em em ringawt a. ka ngaihzawn thu leh min duh leh duh loh thu kha vawi hnih ka zawt a, in ngaihzawn a duh loh thu khan min chhang kha ani si a, chumi hnu ah pawh amahin min duhthu leh engmah min ngaihzawn thu min hrilh lova, thian tha angin kan in en kha ani a.Thil awmzia zawh tumin phone kan tum a, a phone chu a in off hmak hi alo ni a, vawitam chumi zan chuan biak ka tum a, mahse min chhana reng reng a awm lo.

Chumi zan atang chuan kan in be ta lo vang vang a, tum khat chu chawlh hmanga aizawla ka haw laiin kan thian ho kan in hmu khawm a, chutah chuan kan thiannu bangalore a lehkha zir pawh a rawn tel ve a, kan ti ti a kan nui ho bawk bawk a,kan thhiannu chuan "Thianpa, titi pui lawk che ka duh" a ti a.Kil khat ah chuan kan thu dun a.Ti hian min hrilh ta a, Caro-i te nena college khata an kal ho thu te, an in class mate thu te chu min hrilh a, khang hun lai zawng zawng khan min ngaihzawn ve tho zia te, mahse a nu a hlauh em avanga in ngaihzawn a ngam loh thu te chu a sawi a,tichuan midang te ka atanga ka ngaihzawng neih alo hriat khan a rilru nat zia te, a tah nasat zia thu te chu min hrilh a.

Ti hian lo hrilh chhawng turin ka thiannu chu ka chah a, tunah chuan engkim a nih tur ang ang ani zo tawh a, thiantha tak anga min la en duh anih chuan kei pawn ka la en theih reng thu te, in ngaihzawn lam erawh chu thil tih chi ah ka ngaih tawh loh thu te ka hrilh a. khang hun lai khan tlang takin a rilru min hrilh ni se, rinawm taka ka nghah theih zia leh engmah chutianga min chhan loh avang leh in ngaihzawn a duh loh thu ringawt min hrilh avanga ka zah zia leh ka rilru hrehawm zia thu te ka hrilh a. Tunah chuan hun liam tawh chu theihngilha ngaihzawng tha tak nei ve tura ka duhsak zia thu te chu ka hrilh ta vek a.Ani pawh chuan hrilh chhawn ngei alo tum tur thu min hrilh a.

Ka haw kawng ah chuan ka rilru te te in, a hunlai khan thil awmzia dik tak kha min lo hrilh ni la chuan, tunah hian inrem takin kan inngaizawng mai tur ania sin le. Mahse tunah zawng A TLAI ZO TAWH  ka ti a.

Chutia eng eng emaw kan nun hlui ka ngaihtuah neuh neuh lai chuan sana ka'n en a dar 1:15 alo ni der tawh a.A tukah office ka ngaih avang chuan mu turin ka in buataih a, khum lam chu ka pan ta a.