KHA MITE NUFA KHA

Thawk khat lai khan taxi hi ka khalh ve zauh zauha, hun reilote ka khalha aizawl veng hrang hrang ka kal kual chhung khan mize mak pui pui leh thil mak tak tak ka tawng hnem hman hle mai. Thenkhatin min hmusit em ema thenkhatin min zahlo em em thunga, taxi khalh tute hi kan lo zahawm vak loh ania nge, motor chhunga an lo luh hian thenkhat chuan zep tit tet nei lo hian an ti ti nghal bawrh bawrha, an chhungkaw chanchin, an thiante nena an chanchin te, an nupui pasal, an ngaihzawng te nena an chanchin, thil dang eng eng emaw hi an sawi nghal bawrh bawrha, a then phei chu a nuihzathlakin  then khat erawh chu a zahthlak em em thunga, keimah zawk te hi ka lo tim uaih uaih zel nia, han ngaihthlak loh luih ngial tum thin mahila motor te reuh te pakhat chhunga chuang ho vek kan nih si avangin a ngaihthlak loh theih si loh, buaithlak thin teh  ania.

                                     Awle thu kan pehhel rei ta mah mah dawnin ka hria, kha hun reilote chhunga ka passenger neih tawh zinga ka rilru khawih ber mai chu tun tumah hian han sawi chhuaha, han ziah chhuah ve kan tum ange.

                                      Tum khat chu bazaar atang hian nufa hi ka phura, a fanu te chu kum 10 vel tur awm hi ani reuha,  a nu pawh chu ka rin dan chuan kum 28 atanga 30 bawr vel tur hi aniang, eng eng emaw sawiin anu zawk chu a tawng  melh melh renga tichuan Israel point kan thlen hian anu zawk phone hi a rawn zai ret reta, anu chuan la in loud speaker ah ngat a dah lehnghala, tichuan mi pakhat hian khawi lai nge an thlen tawh tih leh an thlen veleh rawn hrilh leh turin a rawn ti a, an ti ti dan atang chuan nupa in ngaina tak an nih dawn hi ka ti a, a pasal chuan a rawn ngaihtuah hmel em ema, tichuan hlim deuh chung chuan an inbiakna chu an ti tawp taa, tichuan kan tlan zela a hnu rei lo deh ah chuan a phone chu a rawn ri leha, chu nu chuan a chhang leh taa, hemi tum ah erawh hi chuan a tawngkam a vin angreng hle,  ‘enge ni fo, ninawm min rawn be reng mai, kan lo ho mek ka tih mawlh mawlh kha, hei matei nen bus kan chang mek’  a tia, dawt chiang lutuk a sawi avang chuan ka mak ti deuh chuan (rear view mirror) atang chuan kan en zauha, chu nu chuan min hmu reng thoa, mahse eng ah vak angailo, a biak ngai bawk chu a be leha, ‘kan lo thleng har lo ang, hei bus alo thleng dawn chiah’ tih pah chuan a phone chu a dah leh taa, afanu bulah chuan ‘boihte I pa in khawnge in kal atih chuan, a nu nen kan inentir tih tur aw, apa (chumi, a hming sawi kher lo mai ang) te inah kan leng tih loh tur aw, thil engkim hre rual inih tawh kha’ atia, tichuan kan tlan zela khatla ah sawn an chhhuk dun ta a. tichuan kei pawh chu ka tlan leh ta.

                                          Kan stand ka thlen chuan ka thiante chuan va tlan tha awm bik ve tiin min lo fiama, mahse kei chuan thil dang vak ka ngaihtuah tawh lo, motor chhung ah chuan ka luta, ka thil hmuh kha ka ngaihtuha, ka tan tangkaina pakhat mah awm lo mahse ka ngaihtuahna erawh a ti kal thui khawp mai.

                                           Ti hian ka ngaihtuah zui ta neuh neuha, kha nu kha bialpa a nei tih chu a phone hman dan atang khan hai rual ani lo a, mahse a fanu nen khera an kal dun kha mak ka ti, hmeichhe naupang kha thil engkim hre rual ani tawh si, khatianga a nuin kha tiang kum atanga thil engkim a hrilh anih chuan leh…a hma hun tur chu ava ngaihtuah awm dawn em aw, naupang chuan puitling tih dan hi an entawnin an zir zel ani si a, khatiang kum rual anih atanga, khatiang mizia rapthalk tak mai a hmuh nghal si chuan a hma hun tur chu ava ngaihtuah awm dawn em aw tih te ka ngaihtuah zui neuh neuha, tunlai hian Mizoram ah hian mi nu leh pa, nu leh tlangval, nula leh pa, in ngaizawng hi an va tam dawn em, heng zawng zawng hi an nupui pasal ten an tih lungawi loh vang nge lerhna leh hurher vang ni ang le, chuti anih siloh chuan chhungkua ah buaina an tawk em ni ang, chu pawh chu lo nita tehreng se nula leh tlangval te pawh chutiang bawkin mi nu leh pa te pawh aniang chu, pawmlai nei tih hre reng chuang hian an duh ve zel chu ani bawk sia, kan zoram nun hi ava tawp tawh em, nupui pasal atan mi tha kan duh vek bawk si a, hetiang the nuaih chuan mi tha hi hmuh an har duh awm teh e aw, hmeichhe naupang chungchang atang ri ngawt pawh khan ngaihtuahna a kal thui duh hle mai, mi nu leh pa thenkhat chuan an fate school ah an hruaiin, an lama lehkha te an zirtir tawk tawk ani a, mahse ka mi tawn nu chuan an bialpa  nen an inhmuhna thlenga a hruai hi amak ka ti a,   ka tena ka haw hluah hluah bawk, kei chuan mahni hmasial leh mahni nawmna chauh zawng ah ka puh lo thei lo, a pasal nen khan lo in hauin  in tih thiam lohna lo nei ta pawh nise a fanu hma hunin a tuar tel ve kher tur kha ka khawngaiha a pawi ka tih pui khawp mai, engtin nge an awm zel ang le.Chutiang bawkin kha nu khan apasal kha ava ti mualphoin ava ti duh dah em aw, an nupa nun chu engtin tak chuan ni zel ang maw.

                                                Chutia ka ngaihtuahna ka kawm melh melh lai chuan ‘a hman theih em’ an rawn ti thut a, ka phu chiang ngei mai,ka ngaihtuahna atang chuan ka harh zawka, min be tute duhna hmun lam chu kan pan ta a.

( thu tlem ka belh lawk duh chu, taxi ani emaw bus ani emaw khawi ah pawh nise, midang ngaihtuah lek loa mahni duh duh sawi ri ngawt hi a ngaithla tu tan hian ninawm anih theih bakah, ngaihthlak a nuam lo fo.)