Take Good Care of My Baby

Zanin chu ka lung ava han leng em, hlim taka nui bawk bawk a in hmangaih taka kan awm dun lai thlalak te ka thlir a, mahse nunhlui an lo chang ve ta chu a ni si. Ka tan chuan auh let rual ani tawh lova, mahse ka hmangaihna erawh ala ngai reng si anih hi. Kum tam liam mahsela ka hmangaihna erawh chu kum te hian a liam pui ve thei ngai dawn lo silo. La ngaiin la thlahlel em em mahila, kei aia duh leh hmangaih zawk a tawng che erawh lawm takin ka thlah a,hlim takin awm dun turin duhsakna ka hlan bawk che u.

Tichuan maw,i hnen ah hian thil sawi duh leh chah duh che tam tak ka nei ve a, khawngaih takin min lo chhiar chhuahsak hram ang che. Kan inkara khatia nang i rawn lan atang khan ka hmangaihi hian rilru dang a pu ta hlauh si a, keiin ka lo hmangaih em em lai hian amah hian min lo hmangaih ve vak lo ani mahna, nangmah chu a thlang ta zawk che anih kha. Mahse ka dem lo a, a hlimna anih chuan hrehawm hle  mahsela  lawm taka ka thlah chu a ngai si anih hi.

Kei min kal sana i hnen pan a duh zawk thu tlang taka min hrilh zan khan mipa pawh ni mahila rilru na avang hian ava lo tah theih chiang em tih ka hmu chhuak chiang ta khawp mai. ka mittui ka va han seng nasa em, ka lukham ka mittuiin a bual huh zozai te kha han hmu ve la chuan mak i ti ang a, i ring lo hial ang, mahse a tak ani tlat si. zing lam dar 2 ah zan tam tak ngaihtha taka ka lo muthilh bawrh bawrh tawhna khuma ngei chuan mu thei loin kan let let a, kan in ngaihzawn tan tir atanga min then ni thleng ka chhui kir a, ka lung a leng a, mahse tih theih ka nei tawh silo.

Ekhai, in in kar ti buaia neih let leh dan leh insawi khawngaihthlak ah min lo ngai hlauh ang e, ka sawi tawh ang khan hlim taka in awm dun hi ka duhthusam ani zawk. Tichuan ka chah duh tak tak zawk che chu maw, uluk takin enkawl la,hmangaih takin dawm la, i hmangaih thu hrilh ning ngai suh o. A chhan chu hmeichhe pangchang leh rilru no tak ani a,i ngaihsakna leh i hmangaihna i tih lan reng kha a phut tlat ania, chu chu i chezia in thinghlim tak siin i ti lang hram hram dawn nia.

In hmuh thiam loh nikhua pawh lo thleng mahse, mipa zawk i nihna theinghilh ngai suh la,zawldawh leh duattu zawk ah tan fo i tum hram hram ang a, khawngaih takin nangmah avanga rilru na a a mittui tih tlak sak lo hram turin ka ngen che. Ihmangaih tak zet ani tih hriaa hlim taka awm turin ka duhsak a,i bulah thlamuang taka nun hlimawm tak hmang reng turin ka duhsak ngawih ngawih a, ka ngen bawk che.

Hmanah chuan kha nula hmeltha leh duhawm tak kha ka bialnu duh ngawih ngawih leh ka hmangaih em em kha ani thin a, khang hun lai khan ka hre sual anih loh chuan tu mipa dang mah hi duh nei ngailoin ka hre thin a,ka kiang ah khan a hlim em em khan ka hria a. Mahse chung te erawh chu hun liam tawh ani a, a bulah khan sawi lan kher erawh a tul tawh lo a nia.

A tawp ber ah chuan hun hlimawm tak hmanga hlim taka leng dun turin leh hmangaihna dik tak rilru pu a, nun nuam tak hmang turin ka duhsak che u a, i theihtawp a nasain duat leh hmangaih takin enkawl  i tum hram dawn nia. Mahse amah avanga i nun a hrehawm phaha a laka i beiseina i hmuh loh avang leh midang duh i nei anih erawh chuan engtik lai pawn ka la pawm thei a, ka hnen ah i rawn kir tir leh dawn nia.

Take Good Care of My Baby...

Chhingkhual Lenmawii

Kum 1960 daih tawh khan Pu Ps.Chawngthu khan hla nalh lutuk mai "Chhingkhual Lenmawii" tih kha alo phuah chhuak daih tawh a, tun thleng pawh hian ala chuai theilo chu anih hi.He hla a phuah chhuahna chhan nula pakhat hmeltha tak a hmuh a sawina bul lawk ah chuan kei pawn he hla a phuah chuah atang a kum 54 na ah chiah ka tana chhingkhual lenmawii chu ka hmu ve anih chu

.

December thla ani tawh a, khua pawn vawh lam a pan a, chhun a reilo a,ni a tawi thin hle mai.Sikulpuikawn atanga kan veng lam pana ka haw chu tlai lam dar 4:30 vel ani tawh a,mitin mai chu mahni in lam panin kan in pel zut zut a, aizawl khawpuiin a ken tel leh reh tawh lo  tur traffic jam chuan keipawh sikulpuikawn atanga treasury square thleng tur pawn darkar khat dawn  lai min dang ta anih chu.Chutia traffic jam kara kal leh hun nghaka ka din lai chuan mi chi hrang hrang chu kawngsir lamah chuan an kal zut zut a, hma lama motor kal hun ngai chang pah chuan ka lo thlir mai mai a.

Chutia mi kal ka thlir vang vang lai chuan motor a ka hla play chu a music rawn rik chhuah dan atang pawh chuan ka hla duh leh nalh ka tih em em thin "Chhingkhual Lenmawii" tih hla zoawi lelte ngei maiin a sak tih hrilh nawn ka ngai lo khawp mai.Pi ruati aw mawi tak maiin "A lenna ka chuan ngai lo, a sakhming ka hre bil lo" a rawn tih hlarh hlarh lai chuan,ngaiteh DC office step bul chiaha chhim lama pana kal nula rawn chhuk khi, ka lo thlir ngawih ngawih a, kekawr dum leh coat dum a ha a, pheikhawk sang lam a bun a, chung a thawmhnaw fai zahawm tak ten a khuh phak loh a taksa fai thianghlim lutuk mai hian Pathian thilsiam thiam leh mawi theih zia a va ti lang chiang leh zual em!

A sam ngil tha zan mai chu tawn lovin a thlah hnap a, chutiang khawpa sam nalh chu a hmel chuan ava ti lang nalh leh zual tehlul em. Hnar ngul sang leh nalh vah mai, mitmeng fiah fel tak anih zia chu a bula mipakhat kal kawng en mang loin a sut her lawih avanga a melh na lamah chuan ka hmu chiang e. Hmai bial lam ka tih dawn chuan kha ai kha chuan tung se ka ti chuang silo, a tawk chiahin Siamtu hian a duang a ni.kawng a cross dawn avangin ka motor hma chiah ah a rawn ding zui anih chu.

Two wheeler nu leh pa te petrol thun sak hmang a tlan fua fua hoin min su mai ang tih hlau ni awm fahranin an ding deuh a,  ka lam a rawn hawi chiang tawka min rawn en mai chu(h) engti zia nge ni ta, ka tek deuh chuaiin ka in hria nia.Khawi lam angel hawlh thlakin nge min rawn melh ti ni awm fahran hian ka mit ka la sawn reng reng tawh lo.Chutia chiang taka lo en ngawih ngawih tu a hmu chu a zak tih hriat tak hian a mit a la sawn vat a,zahzel ni awm fahhran hian an nui deuh seih a(ka lam hawia i seih hianin ka tan khuavel a par leh thin tih hla kha rilru ah alo lut zawk mai),a hmai sen ap ap kara a biangsum lang kalh mai chuan ava han ti famkim leh zual em!

Fimkhur tak chunga kawng a kan chu ka thlir reng a,a pheichheh nalh zia te kha aw,Nula hmeltha leh nalh an thlanna ah pawh hian tel se kawvel pum huap ah pawh mark ka pe sang khawp ang.

Side glass atang chuan ka thir zui vang vang a,ka hmuh phak loh ah min liam san ta anih chu.Tu tih dan tak ah emaw chawlhni tuka fate thawhlawm sem tu atan duhthusam ava han ni em, chutia ka ngaituah zui veng veng lai chuan whistle a ri tuarh tuarh a "Engati nge i din reng a" tih ri chuan mi va ti harh chiang ve le, ka phu zawka traffic police pakhat hian min rawn hui pah hian whistle alo ham tuarh tuarh tawh a, ka hma ami te chuan min lo kalsan fe tawh chu lo niin.

Tichuan nuih ruh ruh chungin ka tlan ve leh ta a.ka hla play lai leh ka thil hmuh mawi leh nalh lutuk kha an va han in zawm chiang tak em, chuvang chuan a bul atangin ka’n play nawn leh ngat a, ngunthluk em em maiin ka ngaihthlak chhunzawm leh a. 

1. A lenna ka chuan ngailo

A sakhming ka hre bil lo

Mahse lamkawi ah kan lo in tawng ta

A sakhmel a darzam ngei

A zunzam  zawlaidi nen

Thinlai ah hrual hrui iang min phuartu hi

Mahse maw ka tan chuanin

Lunglen a ti zual mai thlawn

A sakhming hmel hre bil lo mahila

Tawng leh hian ka mawi nem maw

Saw lamtluang a liam ta e

Suihlunglen tu ber chu

Chhingkhual lenmawii

2. Khawi lam tluang a chhui dawn nge

Hriat ve hi ka nuam ngei e

Hnutiang chhawn tal hianin aw lo hawi se

Dam takin tih mai te pawh

ka nuam e chawnban vaiin

Annem ten  nui hiauvin min chhang mahna

3. Liam mahse za lam phei chu

Chhingmithla a ral chuang lo

Theih chang se a sulhnu hi han zuiin

A lenna khawtlang an maw

Ni rei reng ka cham nang e

Tawn leh ni her leh se maw ka ti.

Don’t Close Your Eyes

Chu zan thiang leh thla eng tak ah chuan hmangaihna tuipui a lut dun mek nula leh tlangval chu, vana arsi leh thla eng tak thlir chung chuan an in kuah rial a. Mahse chu nula rilru no tak chuan a bula thu amah hrethiam em em tu leh hmangaihtu tlangval chu duh ngawih ngawih mahsela, an intawn hma a a lo hmangaih hmasak a bialpa hlui chu a theihnghilh theilo a, rilru na taka a siam hnu a a then avanga a rilru na chu lo chhuak leh in, a mittui chu a luang ngiai ngiai a, a lehlamah chuan hrehawm a ti ru ve em em tho a, mahse insum harsa a ti si.

Mahse amah duat taka kuah vawng vawng tu chu tlangval chuan hrethiam takin a mittui chu a hruk sak niap niap a, a lu chu a awmah chuan bei tir in a chul heuh heuh a, aw ngainatawm leh dam thlap hian, "Duhtak, ani chu hun rei tak atang khan i hmangaih a, i duh ngawih ngawih tih chu ka hria a, tuna ka awm a i bei hle hle chung pawh hian i lo duh tawhna leh i hmangaihna te chu a reh thut dawn lova, i la duh ngawih ngawih tih chu ka hria e. Mahse maw duhtak, tunah chuan i tana rinawm taka awm turin kei hi ka intiam tawh avangin leh ka hmangaih em che avang hian, khawngaih takin in sulhnu i ngaihtuah na thin te kha theingihlh tawh la, nghet takin min kuah la, i rilru te ti hahdamin ka lam lo hawi ve thung tawh ta che," tiin a hrilh malh malh a, nula pawh chuan lungmuang taka a awma bei hle hle chung chuan a lo ngaithla vang vang a.

A thusawi chu sawi chhunzawm lehin, "Duhtak, zanin atang chuan keimah ah ngei hian in nghat tlat tawh la, i suangtuahna lipui ah i chen thuk tak tak hma hian, i tunhma hun hlimawm leh duhawm te chu dah tha in, keimah ah hian a hma a i la hmuh ngai miah loh hmangaihna nasa leh rinawm hi i hmu dawn asin, chu chu ka tiam a che," a ti a. Chu nula chuan thlamuanthlak a ti a, a rilru chhung ril chu a lawm veng veng mai a, tlangval chu a’n en thin a, a hmel ah chuan tih tak tak na a hmu tlat mai si.

Chutah tlangval chu a thaw halh halh a, aw ngainatawm leh chuai raih chung si hian, "Hetia kuah vawng vawng chung che pawh hian, ani chu i rilru ah a la awm reng tih chu ka hria a, â pawh hi ka in ti ve thin lutuk, mahse ka rilru ah hian beiseina sang tak leh nung tak ka nei a, engtik ni ah emaw chuan he ka hmangaihna che hi a lem lova, a tak tak anih zia hi i la hmu in i la hre dawn tih hi ka hre tlat a, chumi hunah chuan i lungngaihna chhum zing hian a kian san tawh che ang a, hmangaihna eng mawi takah hlim takin hmangaihna par chu kan la tlan dun ngei ka ring tlat asin," a ti a.

Chutah zet chuan nula rilru no, a hmangaih hmasa avanga rilru na leh mittui tam tak lo seng tawh tu leh lungngai em em thin chu, lawm avangin a biangah mittui a rawn luang ngiai ngiai a, tlangval chu en in, "Duhtak, ka hmangaih che, dawhthei takin min nghak a, lungngai leh hrehawm taka ka awm lai pawha min hnem thin tu i ni, i tan ka rinawm tlat ang a, ka hmangaih ber fo tawh ang che," a ti a. Tlangval chuan a mittui chu hruk hul sakin ama lam hawi chuan a kuai dak a, duh takin a fawp ta vawng vawng a.